Bunk’Art 1 dhe Bunk’Art 2, dy muzetë më të vizituar të Shqipërisë, kanë blerë platformën e njohur mediatike dhe historike Memorie.al, i themeluar dhe drejtuar nga gazetari dhe historiani Dashnor Kaloçi. Ky është një hap i rëndësishëm në rrugën e ruajtjes dhe promovimit të kujtesës historike të vendit.
E krijuar si portali i parë shqiptar tërësisht i dedikuar historisë kombëtare, Memorie.al përfaqëson sot një arkiv të jashtëzakonshëm digjital që mbledh dokumente, dëshmi, fotografi dhe rrëfime të afta t’u rikthejnë brezave të rinj fytyrën autentike të Shqipërisë së djeshme, si në faqet e saj më heroike, ashtu edhe në ato më të dhimbshme e tragjike.
Bashkimi i Bunk’Art me Memorie.al krijon një pasuri kulturore me vlerë të veçantë. Nga njëra anë janë dy muzetë që gjatë dhjetë viteve të fundit kanë kontribuar në rrëfimin e historisë bashkëkohore të Shqipërisë përmes ekspozitave të vizituara nga qindra mijëra njerëz; nga ana tjetër është një arkiv online që ka ditur të ruajë dhe të bëjë të aksesueshme një sasi të jashtëzakonshme materialesh historike, shpeshherë të pabotuara më parë.
Kujtesa përbën një nga pasuritë më të çmuara të një kombi. Pa njohjen e së kaluarës së tij, asnjë vend nuk mund ta kuptojë plotësisht të tashmen dhe as të imagjinojë të ardhmen. Në këtë kuptim, integrimi i Memorie.al në projektin kulturor të Bunk’Art përfaqëson një investim të mëtejshëm në mbrojtjen e kujtesës kolektive dhe në përhapjen e njohurive historike.
Pas këtij bashkimi, Dashnor Kaloçi dhe Ivi Kaloçi do të vazhdojnë punën e tyre të vyer kërkimore, mbledhëse dhe dokumentuese, e cila i ka mundësuar Memorie.al të shndërrohet me kalimin e viteve në një pikë referimi për studiuesit, gazetarët dhe të apasionuarit pas historisë. Të dy do t’i bashkohen gjithashtu grupit kërkimor të Bunk’Art, duke punuar përkrah një ekipi që përfshin tashmë gazetarë dhe historianë me përvojë të njohur, duke nisur nga Admirina Peci dhe, së fundmi, Kastriot Dervishi. Në drejtimin e projektit, si kurator i përgjithshëm, do të vazhdojë të jetë gazetari Carlo Bollino.
“Jam i lumtur dhe i emocionuar që rikthehem të punoj me Dashnor Kaloçin, me të cilin kemi shkruar faqe të rëndësishme të historisë së gazetarisë shqiptare në Gazeta Shqiptare të viteve të para të tranzicionit”, – komenton Carlo Bollino. “Memorie.al është tashmë një pikë referimi e çmuar për këdo që dëshiron të thellohet në historinë e vendit dhe integrimi i saj në projektin Bunk’Art nuk mund të bëjë gjë tjetër veçse të pasurojë të dyja palët. Dy muzetë Bunk’Art po kalojnë një fazë zhvillimi të rëndësishëm: pas bashkimit me Memorie.al po punojmë për instalacione të reja që janë në përgatitje e sipër, disa prej të cilave do të jenë vërtet befasuese dhe që shpresojmë t’i hapim për publikun që në ditët e para të korrikut.”
“Ky bashkim strategjik synon të bëjë bashkë hulumtimin e gjerë arkivor të Memorie.al me infrastrukturën dhe eksperiencën muzeale të Bunk’Art, duke krijuar një qendër edhe më të fuqishme për dokumentimin e periudhës së komunizmit në Shqipëri”, – komenton Dashnor Kaloçi. “Përmes këtij bashkimi, publiku do të përfitojë nga një qasje më e integruar ndaj dëshmive, dokumenteve ekskluzive dhe materialeve multimediale, duke e kthyer këtë projekt të përbashkët në një pikë kryesore referimi për historinë bashkëkohore shqiptare.”
Objektivi i përbashkët është forcimi i mëtejshëm i kërkimit historik, zgjerimi i arkivave të disponueshme për publikun dhe vazhdimi i ndërtimit të një ure mes kujtesës dhe së ardhmes, në mënyrë që ngjarjet që kanë shënuar rrugëtimin e Shqipërisë të njihen, të kuptohen dhe t’u transmetohen brezave që do të vijnë.
