Zbulohen dokumentet arkivore/ Testamenti pasuror që i erdhi Enver Hoxhës në ’81-in dhe si ja mbajti të fshehur Nexhmija, e cila në ’85-ën, pas vdekjes së tij, shkoi në….

Dashnor Kaloçi

Memorie.al publikon disa dokumenta  arkivore të nxjerra nga Arkivi i Ministrisë së Punëve të Jashtme në Tiranë të cilat prej vitesh janë mbajtur “Tepër sekret”, ku bëhet fjalë për një korrespodencë në mes ambasadës shqiptare në Romë, Ministrisë së Punëve të Jashtme në Tiranë dhe kabinetit të Enver Hoxhës, lidhur me një testament pasuror që një shtetas italian, i quajtur, Romano Gobbo, nga San Darligo, Triste, kishte vendosur që t’ia linte Enver Hoxhës?! Çfarë thuhet në ato dokumente arkivore që redaksia e Memorie.al po i publikon për herë të parë duke filluar nga numri i sotëm dhe si shpjegohet fakti që; ato dokumente zyrtare me një rëndësi aq të madhe që i adresohen Enver Hoxhës, nuk janë të cikluara nga ana e tij ashtu siç ndodhte me të gjitha dokumentet e tjerë edhe nga më të rëndomtat?!

“Bashkangjitur ju dërgojmë letrën origjinale të qytetarit Italian, Romano Gobbo, drejtuar ambasadës sonë në Romë, me anë të së cilës ai njofton se ka përgatitur një testament të vetin në adresë të shokut Enver Hoxha”! Kështu thuhet në mes të tjerash në një prej dokumenteve arkivore me siglën “tepër sekret” që mban datën 30 nëntor të vitit 1981, të cilat Memorie.al i publikon për herë të parë, duke tentuar të hedhë dritë dhe të ndriçojë një nga historitë më të errëta të familjes së ish-diktatorit komunist, Enver Hoxha, që ka të bëjë me një testament pasuror që i ka ardhur atij nga një shtetas italian, me emrin Romano Gobbo!

Nisur nga fakti se, për pasurinë e familjes Hoxha është përfolur shumë nën zë, që nga fundi i viteve ’80-të, dhe hapur e publikisht në shtyp, pas rrëzimit të regjimit komunist në vitin 1991, publikimi i këtyre dokumenteve tenton që të zbardhë sadopak një nga anët më të errëta të familjes së diktatorit komunist shqiptar, Enver Hoxha, e cili për afro gjysëm shekulli  qeverisi me dorë të hekurt vendin e vogël ballkanik, duke e lënë atë një nga më të prapambeturit e më të pazhvilluarit e gjithë kontinentit europian.

Nisur nga kjo, në këtë shkrim po publikojmë dy dokumenta arkivore me faksimilet përkatëse, ku i pari që mban datën 20 nëntor 1981, është një shkresë zyrtare e ambasadës shqiptare në Romë, e firmosur nga ambasadori, Piro Bita, dërguar Ministrisë së Punëve të Jashtme në Tiranë, ku i bëhet me dije se një shtetas Italian, i quajtur, Romano Gobbo nga San Darligo, Trieste, ushqente një dashuri të madhe për “veprën e shokut Enver”, në shenjë respekti shprehte dëshirën që të linte me testament pasurinë e tij, “në favorin tonë”! Në fund të kësaj shkrese zyrtare, ambasada shqiptare e Romës, i bënte me dije Ministrisë së Punëve të Jashtme në Tiranë, se letrën ata po e dërgonin për t’i vënë në dijeni, pasi personin në fjalë nuk e njihnin, por do t’i dërgonin fotografi dhe disa material të shokut Enver.

Dhjetë ditë  pas kësaj letre, më datën 30 nëntor 1981,  ministri i Punëve të Jashtme, Reiz Malile, i dërgon një shkresë zyrtare, sekretarit personal të Enver Hoxhës, Haxhi Kroit, ku e informon për letrën që i ka ardhur  dikasterit që ai drejtonte, lidhur me një shtetas Italian të quajtur, Romano Gobbo, i cili “kishte përgatitur një testament pasuror në adresë të shokut Enver Hoxha”! Dhe në fund të kësaj shkrese zyrtare, ministri Reiz Malile, theksonte se ambasada shqiptare në Romë i bënte me dije se nuk e njihte personin në fjalë!

Letra e ambasadës shqiptare në Romë, për Ministrinë e Punëve të Jashtë në Tiranë, lidhur me shtetasin Italian, Romano Gobbo, që donte t’i linte pasurinë Enver Hoxhës

                                                  A M B A S C I A T A

 DELLA REPUBBLICA POPOLARE D’ALBANIA     Roma 16.11.1981

  I N   I T A L I A                  VIA ASMARA.9

 TEL 83.80.725

 Nr. 301 

                                           MINISTRISE SE PUNEVE TE JASHTEME

           T I R A N E

Bashkangjitur ju dërgojmë letrën që i drejton përfaqësisë sonë i quajturi GOBO Romano me banim në San Darligo, Triste, nga e cila del se personi në fjalë është simpatizant i RPSSH dhe që ushqen dashuri të madhe për veprën e shokut ENVER. Në shenjë të këtij respekti i shpreh dëshirën që të lërë me testament pasurinë e tij në favorin tonë.

Letrën e tij po ua dërgojmë për t’u vënë në dijeni. Ne nuk e njohim personin. Do t’i dërgojmë një fotografi dhe material të shokut ENVER.

A M B A S A D O R I

  (PIRO BITA)

………………………………………………………………………………………………………………………………………………

Letra e ministrit, Reiz Malile, drejtuar Haxhi Kroit, lidhur me testamentin pasuror që shtetasi italian, Romano Gobbo, ia linte Enver Hoxhës

Shoku Haxhi Kroi,

Bashkangjitur ju dërgojmë letrën origjinale të qytetarit Italian, Romano Gobbo, drejtuar ambasadës sonë në Romë, me anë të së cilës ai njofton se ka përgatitur një testament të vetin në adresë të shokut Enver Hoxha.

Ambasada jonë na njofton se ky person nuk njihet prej saj.

 Tiranë, më 30 nëntor 1981                                              Reis Malile

………………………………………………………………………………………………………………………………………………

Nesër do të lexoni:

1. Testamentin e plotë pasuror që shtetasi Italian, Romano Gobbo, ia linte Enver Hoxhës!
2. Kush ishte Romano Gobbo, çfarë lidhjesh kishte ai me Shqipërinë dhe përse kishte vendosur që pasurinë e tij t’ia linte me testament, Enver Hoxhës?!
3. Përse korrespodenca me dokumentet arkivore nuk është sigluar nga Enver Hoxha ashtu siç ndodhte rëndom me çdo lloj dokumenti zyrtar ose jo, që i adresohej atij?!
4. Përse është ndëprerë korrespodenca ndërmjet ambasadës shqiptare në Romë, Ministrisë së Punëve të Jashtme në Tiranë dhe kabinetit të Enver Hoxhës?!
5. Kjo korrespodencë, a mund të jetë vazhduar më pas nga Zbulimi (Sigurimi) Politik personal i Enver Hoxhës, i cili ka ekzistuar prej vitesh në bazë të një platforme të Byrosë Politike dhe godina e saj ka qenë në një vilë sekrete, diku afër Radio-Televizionit Shqiptar?!
6. Cilët ishin personat që kishin drejtuar në vite Sigurimin Politik personal të Enver Hoxhës deri në vitin 1990-të?!
7. Ç’farë ishte në të vërtetë ai testament pasuror që vinte në adresë të Enver Hoxhës dhe a u mbajt ai i fshehtë nga Nexhmije Hoxha?!
8. Dëshmia e ish-shefit të Zbulimit pranë një ambasadë shqiptare në Perëndim, i cili tregon se në fundin e vitit 1984, atë e thirrën në Komitetin Qëndror të PPSH-së në Tiranë dhe S.L. e urdhëroi që të merrej me “Testamentin pasuror” dhe ajo të mbahej në sekretin më të madh?!
9. Si e shpjegon dhe e argumenton ish-shefi i Zbulimit faktin se: funksionari i lartë i Komitetit Qëndror të PPSH-së që urdhëroi atë, nuk ishte nga Sigurimi i Shtetit, siç dhe ishte praktika në të tilla raste, por ai ishte në sektorin e Marrdhënieve me Jashtë në Komitetin Qëndror?!
10. Si e komenton ish-shefi i Zbulimit faktin se ai urdhër iu dha jo në vitin 1981 kur dhe erdhën njoftimet nga ambasada shqiptare në Romë për testamentin pasuror në adresë të Enver Hoxhës, por vetëm në fundin e vitit 1984, kur shëndeti i Enverit kishte filluar të përkeqësohej ndjeshëm?!
11. Si i filloi ai dhe Zbulimi Politik investigimet për testamentin pasuror dhe si ranë në gjurmët e Romano Gabbo, pasi paguan disa shuma në valutë nga një agjent i tyre me origjinë nga Kosova?!
12. Dëshmia e ish-Shefit të Zbulimit se si Nexhmije Hoxha menjëherë pas vdekjes së Enverit, e shoqëruar nga Sulo Gradeci bëri një vizitë të fshehtë në Itali, gjë për të cilën nuk kishte dijeni gjysma e familjes së saj?!
13. Cilët janë personat që e shoqëruan Nexhmije Hoxhën në vizitën e fshehtë të saj në Itali, gjë për të cilën ish Shefi i Zbulimit disponon edhe fotografi?!
14. Përse Nexhmije Hoxha e deklaroi atë vizitë në Itali për “arsye shëndetësore”?!
15. Përse Nexhmije Hoxha nuk shkoi në Francë “për arsye shëndetësore” ku shkonin zakonisht të gjithë pjestarët e familjes së saj dhe ata të udhëheqjes së lartë?!
16. Ç’farë thuhet në përgjigjen zyrtare të Komunës së Triestes lidhur me shtetasin Romano Gobbo, pas kërkesës së bërë nga ana e Memorie.al?
17. Përse Memorie.al i publikon këto dokumenta për herë të parë pikërisht sot që u njoftua se ndërroi jetë Nexhmije Hoxha?!/Memorie.al