Dashnor Kaloçi
Pjesa e gjashtë
Memorie.al publikon disa dokumenta arkivore të nxjerra nga Arkivi Qendror i Shtetit në Tiranë (Fondi i ish-Komitetit Qendror të PPSH-së), ku ndodhet një dosje voluminoze me siglën “Tepër Sekret” e cila i përket vitit 1982, ku Grupi i Instruktorëve të Ushtrisë pranë aparatit të Komitetit Qendror të PPSH-së, Dega e Sigurimit të Ushtrisë, zv/ministri i Punëve të Brendshme Zylyftar Ramizi dhe ministri Hekuran Isai, informojnë Komitetin Qendror dhe personalisht Ramiz Alinë, apo sekretarin e Komitetit Qendror, Simon Stefani (që mbulonte organet e Diktaturës së Proletariatit, pas vdekjes së Hysni Kapos), lidhur me: “veprimtari të ndryshme armiqësore dhe spiunazhi” si dhe ngjarje të jashtëzakonshme të ndodhura gjatë atij viti në disa rrethe të vendit, kryesisht ato që ishin nën vartësinë e Degëve të Punëve të Brendshme të Shkodrës, Lezhës, Durrësit, Vlorës, Gjirokastrës, Sarandës, Pogradecit, Kolonjës etj.
Të gjitha dokumentet e plota me raport-informacionet e përpiluara nga ministri i Punëve të Brendshme, Hekuran Isai, dërguar Komitetit Qendror dhe personalisht Ramiz Alisë e Simon Stefanit, duke filluar nga: Dokumenti me informacionin për ngjarjen e Shkodrës, ku nënoficeri i Regjimentit të Artilerisë Kundërajrore, Hasan Sulejman Hyseni, pasi qëlloi katër herë me pistoletë ndaj komandantit të Prapavijës, oficer Hilmi Gavoçit, u nis në drejtim të fshatit Zogaj, ku i veshur si çoban me dele, kaloi klonin, por mbeti i vrarë në përpjekje me forcat e Kufirit, pasi më parë kishte plagosur nënoficerin e Kufirit, Misto Osmani.
Dokumenti me raport-informacionin e Degës së Sigurimit të Ushtrisë, për muajin tetor 1982, ku 37 persona, (oficerë, nënoficerë, ushtarë dhe punonjës civilë), “implikohen në ngjarjet armiqësore dhe veprimtari spiunazhi”, etj., si: ish-Komandanti i Korpusit të Shkodrës, Tefik Ruçi me detyrën e Komandantit të Forcave Vullnetare të rrethit, i akuzuar si “agjent i UDB-së”, oficer Nasi Bakuli, efektiv i Grupimit të 8-të të Elbasanit, për “agjitacion e propagandë”, etj., oficer Sami Sokoli, pedagog i Shkollës së Aviacionit në Vlorë, ndiqet në përpunim aktiv 2/A, për “veprimtari spiunazhi”, etj., Xhelal Stojku, me origjinë nga Dibra dhe banues në Tiranë, punonjës në Ndërmarrjen e Riparimeve të Ushtrisë, akuzohet se: “është tallur me fjalimet e udhëheqësit kryesorë të Partisë”, “oficeri Beqir Xhaxho, efektiv i Shkollës së Lirë, Demës – Fier…,thotë se këta e vranë vetë Mehmet Shehun dhe e trajtojnë popullin si bagëti, oficer Petro Mile, në Brigadën e Këmbësorisë në Himarë, “ka humbur një dokument sekret me planëzimin e shërbimit të Kufirit”, oficer Riza Cara, i Shkollë së Lirë Ushtarake në Melan të Peshkopisë, “ka humbur Buletinin nr. 1 të Komitetit Qendror të PPSH-së”, oficer Petrit Jarnexhi, ish-sekretar i organizatës bazë të Partisë së Shkollës “Skënderbej”, “mbante të fshehura materialet e armikut Mehmet Shehu”, oficer Spiro Adhami, Komandanti i Akademisë Ushtarake, “mbante në kasafortë dokumente të armikut Kadri Hazbiu”, etj.
Dokumenti me raport-informacionin ku për periudhën janar-nëntor 1982, forcat e Kufirit të Degës së Punëve të Brendshme të Durrësit dhe Sarandës, kanë kapur 16 mjete detare të huaja me 49 persona në bord, (italianë, grekë, australianë, gjermano-perëndimore, etj.), që ishin futur në ujërat tona territoriale, “gjoja për shëtitje turistike”, vrasja nga forcat e kufirit të dy shtetasve italianë afër pikës ushtarake të Kakomesë dhe Gjirin e Karaburunit, për: “shkelje të kufirit, veprimtari spiunazhi, kontrabandë”, etj., kapja e një numri të madh shkelësish brenda territorit të Republikës Popullore Socialiste të Shqipërisë, “pas zbulimit të veprimtarisë armiqësore të Mehmet Shehut, Kadri Hazbiut, Feçor Shehut, etj., me qëllim zbarkimi siç ndodhi me bandën Xhevdet Mustafa”, etj.,
Raport-informacioni për katër sportistët: Ali Kastrati, Arjan Bimo, Halim Durimi dhe Petro Ruci, të cilët i përkasin ekipeve të futbollit: “Partizani”-, “Shkëndija”, “17 Nëntori”, dhe “Flamurtari”-, ku gjatë aktiviteteve sportive të zhvilluara jashtë shtetit, “kanë marrë me vete sasi të mëdha valute, duke blerë mallra të ndryshme dhe gjatë kthimit, janë kapur nga organet tona doganore, i pasi i kanë futur ato kontrabandë”, etj.
Raport-informacioni për ngjarjen e jashtëzakonshme të ndodhur në mesin e muajt tetor të vitit 1982, kur në afërsi të Bazës së Ushtarake të Pashalimanit, “u diktua një nëndetëse e huaj dhe megjithëse Flota Luftarake Detare, mori urdhër ta detyronte atë ta dilte në sipërfaqe dhe më pas ta qëllonte, ajo nuk e kreu këtë detyrë luftarake, për shkak të…”!
Raport-informacioni për oficerin Nasi Bakuli me origjinë nga fshatrat e Gjirokastrës dhe me detyrën e komandantit të Grupit 155 m/m. në Peqin, efektiv i Brigadës së 3-të të Artilerisë në Elbasan i cili “zhvillon agjitacion e propagandë kundër pushtetit popullor dhe flet me fjalë fyese kundër fëmijëve të udhëheqjes…”, etj.
Raport-informacioni për “veprimin e lëshimit të 70 km. sipërfaqe ujore palës jugosllave në afërsi të Lumit Buna, nga ana e Mehmet Shehut, Kadri Hazbiut dhe Nesti Nases, gjë e cila erdhi pas kontakteve të vazhdueshme disa vjeçare ndërmjet komisioneve përkatëse, lidhur me ngjarjen e vitit 1975, kur një anije jugosllave qëlloi anijen tonë “Ismal Mustafa” dhe vrau kapitenin Fran Ivanaj”, etj.
Fondi: KOMITETIT QENDROR TË PARTISË PUNËS SHQIPËRISË
(GRUPI I INSTRUKTORËVE TË USHTRISË)
Titulli dhe përmbajtja
INFORMACIONE TË MINISTRISË SË PUNËVE TË BRENDSHME, DREJTUAR KOMITETIT QENDROR TË PARTISË SË PUNËS SË SHQIPËRISË DHE GRUPIT TË INSTRUKTORËVE TË KOMITETIT QENDROR,PËR VEPRIMTARI ARMIQËSORE DHE NGJARJE TË JASHTËZAKONSHME
Raport-informacioni dërguar Ramiz Alisë, nga Ibrahim Farrici, sekretari i Komitetit të Partisë së Repartit Ushtarak 7166, lidhur me “veprimtarinë armiqësore” të oficer Nasi Bakuli, me detyrë komandant i një reparti të artilerisë në Peqin
PARTIA E PUNËS SË SHQIPËRISË SEKRET
KOMITETI I PARTISË REP. 7166 Exemplar Nr.1
Nr. 116/Prot Elbasan, më 7.5.1982
Lënda: Informacion mbi veprimtarinë e oficer Nasi Bakuli
SHOKUT RAMIZ ALIA
SEKRETAR I KOMITETIT QENDROR TË PPSH
TIRANË
Oficer Nasi Bakuli, i biri i Koços dhe i Lefterisë, ka lindur në fshatin Saraqinisht të rrethit të Gjirokastrës, në vitin 1950.
Vjen me origjinë fshatar i mesëm dhe në gjendje nëpunës (oficer), anëtar partie, ka mbaruar Akademinë Ushtarake, me detyrë, komandant i Grupit 152 m/m. Peqin. Efektiv i Br. 3-të Artilerisë Elbasan.
Para çlirimit, prindërit e tij janë marrë me blegtori. Gjyshi i tij ka qenë emigrant në Turqi. Është kthyer në vendlindjen e tij. Pas çlirimit, janë shtetëzuar 50 kokë bagëti. Ndërsa babai i nënës së tij, ka qenë prift.
Theksojmë se i lartpërmenduri, ka qenë i fejuar dhe është ndarë. Pastaj është fejuar me E. Apostol Gj. nga katundi Senice i rrethit të Sarandës, tani banuese në qytetin e Durrësit.
Nga të dhënat që ne disponojmë, del se Nasi Bakuli ka ushtruar veprimtari armiqësore në formën e agjitacionit dhe të propagandës, që në shtator të vitit të kaluar dhe e ka thelluar këtë veprimtari veçanërisht pas veprimtarisë armiqësore të Mehmet Shehut.
Veprimtaria armiqësore e të lartpërmendurit, shprehet në këto drejtime:
- I kundërvihet rolit udhëheqës të Partisë dhe veçanërisht, udhëheqësit kryesor të saj.
Në këtë drejtim, ai shprehet: “….Udhëheqësi kryesor i Partisë, nuk e ka jetën e gjatë, se është në gjendje të lartë të tensionit nervor. Këta nuk janë në rregull për veten e tyre, na kanë mbyllur në mënyrë të atillë, që nuk kemi lidhje me botën e jashtme…në rast se nuk vdes udhëheqësi kryesor i Partisë, ne do të mbytemi të gjithë. Ky ka për të ikur dhe do të vij një tjetër e ka për të ardhur rehat-rehat…! Por ky (është fjala për udhëheqësin kryesor të Partisë), do të iki si bisha e shkalluar, ka filluar nga egërsia, të gjithë u qëruan, të gjithë të pakënaqur janë…”!
Ai flet me urrejtje edhe për familjet e shokëve të udhëheqjes, konkretisht shprehet: “…Çfarë kanë studiuar djemtë e këtyre të mëdhenjve, asgjë nuk kanë studiuar”, i pohon ai bashkëpunëtorit.
Duke folur me urrejtje për materialet e Partisë dhe veprat e shokut Enver, ai shprehet: “…Asgjë nuk kam studiuar dhe nuk kam ndërmend të lexoj nga të këtyre, se ato janë gënjeshtra…! Na lodhën, duke na thënë; o burra lexoni këtë e atë vepër, në format e edukimit…! Po ç’të lexosh? Budallallëqet…si ja bënë Hrushovit, si ja bënë atij, si ja banë këtij…Hrushovi bëri qejfin e vet, do të pyeste për këta…”!
Duke nënvleftësuar rolin e Stalinit, ai shprehet: “…Stalini nuk ishte i aftë për mbrojtjen, ai lejoi gjermanët të vinin deri afër Moskës”!
- I kundërvihet rendit tonë socialist dhe ka mosbesim ndaj tij dhe në forcën e mbrojtjes sonë.
Lidhur me këtë, ai shprehet: “…Ne nuk kemi asnjë shtet mik, jemi prishur me të gjithë, dhe më në fund, u miqësuam me grekërit, të cilët deri tani i kemi pasur armiq…! Populli kërkon të shprehet, jemi të mbyllur, po të hapësh kufijtë, edhe pulat fluturojnë nga Shqipëria, e jo njerëzit, jemi të rrethuar e shumë prapa botës…”!
Duke folur me urrejtje për shtetin tonë, midis të tjerash ai thotë: “Këtu është burgu i botës, ky shtet mbahet me spiunë dhe me raportime, situatën nuk e kemi të mirë. Nuk shikon se ç’bëhet? Vrasje, arrestime, çdo vit po këto gjëra bëhen, ne duam të jetojmë të qetë e të gëzuar, por këta (fjala është për udhëheqjen), nuk na lënë…”!
Duke folur me përbuzje për popullin tonë dhe kulturën e tij, midis të tjerash thotë: “…Këtu ka njerëz pa kulturë dhe të paaftë, se mos ka kulturë në Shqipëri, janë budallenj, muzhikë”! dhe duke shprehur kulmin e urrejtjes së tij, si ndaj popullit, e ndaj udhëheqjes, shprehet: “Po të kem gjë në dorë, i djeg të gjithë…”!
- Ka zhvilluar agjitacion e propagandë kundër rendit tonë kooperativist, duke shprehur pakënaqësi:
“…Në fshat, – thotë ai, – jeta është shumë e rëndë. Nuk ka asgjë për të ngrënë e për të veshur? Edhe bagëtitë dhe lopët i kanë tufëzuar, çdo gjë e kemi keq. Njerëzit po vriten rrugëve, po vjedhin, hajdut si këtu nuk ka…”! Flet me nostalgji për të kaluarën e prindërve të tij. “…Para çlirimit, – shprehet ai, – kemi qenë të pasur, kemi qenë të gjithë të zgjuar, por familjen time, nuk e kanë dashur. Ç’kanë tashti?! Po prish dynjanë e lekëve e ato nuk më dalin”?!
Shpreh pakënaqësi, pse nuk është ngritur në përgjegjësi. “…Mua nuk më besojnë, nuk më ngrenë në pozitë, megjithëse, kam katër shkolla të larta dhe jam mjaft i zgjuar, – thotë ai dhe më tej vazhdon – po më erdhi koha, do të hakmerrem. Unë nuk bëhem i kënaqur, edhe Mbret të Shqipërisë të më bëjnë. Ne, kanë dashur të na bëjnë familje të pakënaqur. Të isha unë në rrethet e Moskës, do të isha bërë Ylli i Botës”!
Shprehet se në vendin tonë, bëhet një jetë plot me vuajtje, duke propaganduar, për një botë tjetër, me një jetë më të mirë, për të gjithë njerëzit.
- Për vrasjen e armikut Mehmet Shehu, ai është shprehur se:
“…Është shtrënguar litari dhe një ditë do të këputet, Mehmet Shehu vrau veten, nipi i tij, Feçor Shehun, e arrestuan. Ata deshën të hapnin Shqipërinë, ndërsa udhëheqësi kryesor, nuk e do këtë, sepse punon për lavdinë e vet, në kurrizin tonë, në kurrizin e popullit…”!
5. Ka ushtruar agjitacion e propagandë me admirim për Bashkimin Sovjetik, duke u shprehur:
“…Se me rusët kemi luftuar bashkë, se ata janë njerëz të mrekullueshëm, gjuha ruse është e dashur, ata kanë literaturë të gjerë, të cilën e admirojnë strategë ushtarakë dhe shkencëtarët e mëdhenj. Rusët janë kudo, ata komandojnë botën…”! Fati ynë që nuk isha në Moskë e të isha martuar me një ruse. Kush nuk i do ata? Dhe ato që i ndanë, i kanë ndarë me lot në sy, nuk i zinte gjumi, tragjedi e madhe ndarja, etj.”!
Të gjitha këto, Nasi Bakuli i konkretizon dhe me dëshirën e madhe që ka për t’u arratisur nga Shqipëria. Lidhur me këtë problem, midis të tjerave thotë: “…Të gjitha ëndrrat do të kisha të realizueshme me rusët, kam njerëz në Turqi, më mirë hamall në porto andej, ishalla hapet rruga dhe të iki, të iki nga Ushtria dhe nga Shqipëria”.
Nga të dhënat që kemi, del se Nasi Bakuli, ka marrë takim me shtetas të huaj që kanë ardhur si vizitorë në vendin tonë. Në muajin shtator të vitit të kaluar, kohë në të cilën ai ka filluar dhe veprimtarinë armiqësor, ka vajtur në Durrës në shtëpinë e Perikli Kokocanit. Aty, është takuar me dy vizitorë të ardhur nga Greqia, me të cilët ka zhvilluar biseda. Këto biseda, Nasi Bakuli ja shfaqi bashkëpunëtorit, ku i thotë: “Ajo grekja, më tha se në Greqi, njerëzit si ti janë ministra”.
Theksojmë se për të vërtetuar tërë veprimtarinë e tij, në përplasje me bashkëpunëtorin, u përdor Teknika Operative. Prandaj, duke analizuar të dhënat, kemi arritur në përfundim, se Nasi Bakuli është në pozita armiqësore.
Meqenëse prova legale nuk ka, që ndaj tij të përdoret politika e goditjes dhe duke marrë parasysh faktin se i përmenduri shërben në armë speciale, duke mos përjashtuar edhe mundësinë që ai të jetë agjent i Zbulimit të huaj, ne mendojmë që Nasi Bakuli, të lirohet nga Ushtria.
Theksojmë se, për qëndrimin politik të prindërve të tij, kemi pak të dhëna, sepse dosjen si komunist, e ka në Korpusin e Gjirokastrës. Memorie.al
SEKRETARI I KOMITETIT TË PARTISË REPARTIT 7166
IBRAHIM FARRICI
Vijon numrin e ardhshëm
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
