Dashnor Kaloçi
Memorie.al publikon historinë e dhimbshme të Satvri Rafaelit nga qyteti i Korçës, i cili pasi u shkollua në një kolegj të Athinës, u kthye në atdhe, ku përfshi në lëvizjen antifashiste. Diplomimi më pas në Akademinë e Pragës, për Skenografi dhe Kanto, martesa me gruan hungareze dhe karriera e shkëlqyer si solist e skenograf në Teatrin e Operës dhe Baletit e skenat operistike botërore, ku fitoi disa çmime. Tentativa e arratisjes nga Shqipëria në vitin 1963, bashkë me vëllanë e tij dhe disa shokë të tjerë dhe kalvari gjatë i vuajtjeve në burgjet e regjimit komunist, pasi i pushkatuan vëllanë…
Kush ishte Stavri Rafaeli
Stavri Rafaeli, u lind në 15 shtator të vitit 1923, në qytetin e Korçës, prej nga është edhe origjina e familjes së tij, tepër e njohur në atë qytet për lidhjet e saj me artin dhe trashëgiminë e vlerave kulturore të atij qyteti. Që në vogëli, ai shfaqi prirje për pikturë dhe këngë, të cilat ishin të kultivuara në atë familje, që prej disa brezash. Këto dhunti që ia kishte dhënë natyra, prindërit e Stavrit u kujdesën që t’ia ngulitnin së tepërmi për t’ia bërë dhe pasion të jetës së tij. Kur Stavri nuk ishte më shumë se shtatë-tetë vjeç, u dërgua për të marrë mësime tek një nga piktorët më të njohur të asaj kohe në qytetin e Korçës. Pas mbarimit të shkollës unike në qytetin e tij të lindjes, Stavri, u dërgua në kryeqytetin helen për të ndjekur mësimet e gjimnazit, të cilin ai e mbaroi në vitin 1941. Po në atë vit pas diplomimit në Athinë, Stavri u kthye në qytetin e tij të lindjes, pranë familjes dhe si shumë të rinj të tjerë të asaj kohe u përfshi në lëvizjen antifashiste, duke marrë pjesë në formacionet partizane të krahinës së Korçës. Pasionin e tij për këngën, Stavri, nuk e harroi por e vazhdoi edhe gjatë kohës që ishte në mal, duke organizuar koret partizane. Pas mbarimit të luftës, ai qëndroi në qytetin e Korçës, ku u mor me organizimin e aktiviteteve kulturore dhe artistike të ushtrisë.
Diplomohet në Pragë për Skenografi e Kanto
Duke parë dhuntitë e tij në fushën e pikturës dhe këngës, në vitin 1947 Stavri Rafaelit, ju akordua një bursë shtetërore për të ndjekur studimet e larta, në degën e Skenografisë pranë Akademisë së Arteve të Bukura në kryeqytetin e Çekosllovakisë, Pragë. Në atë Konservator krahas skenografisë, Stavri ndoqi paralelisht dhe degën e Kantos dhe në vitin 1951, ai u diplomua me rezultate të shkëlqyera në të dyja degët. Gjatë periudhës që Stavri ndiqte studimet në Konservatorin e Pragës, ai u njoh dhe u dashurua me një vajzë nga Budapesti të quajtur, Maria, e cila gjithashtu studionte për piano në degën e Muzikës të asaj Akademie. Pas marrjes së diplomës në vitin 1951, Stavri, u kthye në Shqipëri së bashku me bashkëshorten e tij, Marien, me të cilën kishte lidhur kurorë që në Pragë. Pas kthimit në Shqipëri, ai u emërua menjëherë këngëtar dhe piktor pranë Teatrit Popullor dhe Filarmonisë së Shtetit në Tiranë. Punoi për dy vite në këtë institucion, në vitin 1953, me krijimin e Teatrit të Operës dhe Baletit, Stavri u emërua si solist pranë sektorit të solistëve të atij teatri. Që në fillim Stavri Rafaeli, spikati si një mjeshtër i vërtetë i kantos, gjë e cila bëri që atij t’i besoheshin shumë role kryesore, në premierat e para të Operës që u vunë në skenë asokohe. Lidhur me këtë, përgjegjësi i Arkivit pranë Teatrit të Operës dhe Baletit, Zamir Këlliçi, midis të tjerash tregon: “Në dokumentacionin e pasur arkivor që ndodhet pranë këtij Arkivi, një vend të veçantë zë edhe dosja e Stavri Rafaelit, e cila është tepër e pasur për shkak të aktivitetit të tij artistik tepër të ngjeshur. Duke qenë se Stavri spikati me një përgatitje të lartë profesionale, që në fillim të karrierës, atij i’u besua roli i Knjazit, në operën e parë “Rusalka” që u vu në skenë nga ky teatër. Pasi shkëlqeu në atë rol, atij i’u ngarkuan dhe mori pjesë si solist i parë, pothuaj në të gjitha pjesët e tjera që u vunë në skenë pas “Rusalka”. Po kështu në vitin 1955, ai mori pjesë në turneun që Teatri i Operës dhe Baletit, që zhvilloi në Kinë, Mongoli, Kore dhe Vietnam. Në të gjitha koncertet që u zhvilluan në këto shtete të Azisë, Stavri, shkëlqeu në mënyrë të veçantë nga të gjithë solistët e tjerë dhe pati duartrokitje të vazhdueshme gjatë interpretimeve të tij. Lidhur me shfaqjet e dhëna nga solistët shqiptarë në atë kohë, shkroi edhe shtypi i atyre shteteve, ku një vend i veçantë i’u rezervua edhe Stavri Rafaelit. Pothuaj të gjitha gazetat e quajtën atë “solisti shqiptar me dhunti të mbinatyrshme”, kujton Zamir Këlliçi. jashtëzakonshëm.
Solist i parë i Operës
Pas debutimeve të suksesshme si solist në pjesët e para që u vunë në skenë nga Teatri i Operës dhe i Baletit, në vitin 1956, Stavri Rafaeli, u dërgua në Bashkimin Sovjetik për t’u specializuar pranë teatrit të famshëm “Bolshoi” të Moskës. Për një vit që Stavri qëndroi pranë atij teatri, mori pjesë në disa shfaqje, ku vlen të përmendet roli i Dukës, tek “Rigoletto” i Xhuzepe Verdit, ku ai pati një sukses të madh. Po kështu përveç roleve që luajti në “Bolshoi”, Stavri bëri edhe disa turne në qytete të ndryshme të republikave të Bashkimit Sovjetik, si në Leningrad, Vilnius, Tbilisi, Kiev etj, ku gjithashtu interpretimet e tij u pritën mjaft mirë. Në vitin 1957 pasi mbaroi specializimi në Moskë, Stavri, u kthye në Shqipëri dhe në atë kohë atij i’u besuan disa nga rolet më të spikatura të pjesëve operistike botërore, si roli i Alfredit tek “Traviata” e Xhuzepe Verdit, Almaviva tek “Berberi i Seviljes i Rosinit, Lenski tek “Eugjeni Onegin” i Çajakovskit etj. Në të gjitha këto role ai pati një sukses të jashtëzakonshëm dhe interpretimi i tij konsiderohej si i barabartë me ato, të shumë kolegëve të tij që asokohe interpretonin në skena të ndryshme të botës. Pas këtyre shfaqjeve, ai mori pjesë edhe në turneun e Hungarisë, ku me rolin e Dukës, tek “Rigoletto”, pati mjaft sukses dhe publiku hungarez i dhuroi duartrokitje të vazhdueshme me ovacione të gjata. Pas kësaj shfaqje, ai mori pjesë dhe në disa koncerte të tjera, ku interpretoi arie të ndryshme nga repertori më i zgjedhur i pjesëve të operistikës botërore.
Çmim në Vjenë dhe sukses në Europë
Karriera artistike e shkëlqyer e Stavri Rafaelit, u pasua me pjesëmarrjen e tij në Festivalin e VII-të të Rinisë Studentore, që u zhvillua në Vjenë të Austrisë në vitin 1959. Lidhur me këtë aktivitet artistik të përmasave botërore, ku solisti shqiptar Rafaeli, pati një sukses të jashtëzakonshëm, Zamir Këlliçi, tregon: “Pjesëmarrja e Stavri Rafaelit në atë festival të rinisë studentore, shënoi një nga kulmet e jetës së tij artistike, për arsye se për interpretimin e tij brilant si vokalist, ai u nderua me çmimin e dytë. Pas suksesit që arriti në Vjenë, Stavri Rafaeli mori pjesë dhe në një turne tjetër të zhvilluar në Itali, ai interpretoi me mjaft sukses arie të ndryshme nga pjesët më të njohura të operistikës botërore. Pas Italisë ai mori pjesë edhe në një turne tjetër në Çekosllovaki, ku ai ishte diplomuar dhe kishte kaluar disa nga vitet më të bukura të rinisë së tij. Në këtë turne ku u dhanë disa shfaqje në qytetet e Pragës, Bratislavës, Koshicës etj, Stavri interpretoi me mjaft sukses rolet e Dukës te “Traviata” e Verdit dhe Alfredit te “Rigoletto”. Po kështu gjatë atij turneu, Stavri përgatiti dhe skenografitë e kostumet e disa prej pjesëve që u interpretuan, nga artistët shqiptarë të TOB-it. Pas kthimit në Shqipëri, në vitin 1961 ai mori pjesë si solist kryesor në disa prej kryeveprave të operistikës botërore, siç ishte Pinkertoni tek “Madam Baterflaj” i Xhiakomo Puçinit dhe ai i Don Hozesë tek opera “Karmen” i Zhorzh Bizesë. Roli i Don Hozesë të cilin ai e interpretoi në vitin 1961, shënoi edhe fundin e karrierës së tij të shkurtër por brilante”, dëshmon Zamir Këlliçi, lidhur me ish-mjeshtrin e madh të vokalit shqiptar, Stavri Rafaeli.
Tentativa e arratisjes, 15 vjet burg
Ndonëse Stavri pati një karrierë të shkëlqyer gjatë atyre 13 viteve të interpretimit të tij në skenën shqiptare dhe në ato botërore, ai nuk ishte i kënaqur nga jeta që bënte dhe trajtimi që i bëhej në përgjithësi, artistëve në Shqipëri. Ndonëse ai mbante funksionin e sekretarit të Organizatës Bazë të Partisë në Teatrin e Operës dhe Baletit, nuk ishte aspak një komunist fanatik. Përkundrazi ish-kolegët e tij e kujtojnë atë si një njeri shumë liberal dhe tepër të kohës nga të gjitha pikëpamjet. Stavri kishte shëtitur e parë shumë vende të ndryshme të Botës dhe ai kishte një botëkuptim tjetër për jetën. Ky fakt e bënte të mos pajtohej aspak me politikën e regjimit komunist në Shqipëri, ndonëse atij i kishte rënë shorti për të drejtuar, një nga celulat e komunistëve që merreshin me art. Pakënaqësitë e shumta dhe acarimi i tij me regjimin komunist në fuqi, filluan sidomos pas prishjes së Shqipërisë me Bashkimin Sovjetik dhe vendet e tjera të Europës Lindore, që përbënin Kampin Socialist. Në atë kohë shumë intelektualëve shqiptarë që kishin studiuar në vendet e Lindjes dhe ishin martuar me vajza të huaja, regjimi komunist i bëri presion që t’i ndanin ato. Edhe Stavri Rafaeli, pati presione të ndryshme që të ndahej nga bashkëshortja e tij hungareze, Maria, me të cilën ai kishte lidhur jetën që në vitin 1951, kur ishin studentë në Pragë. Stavri, nuk pranoi që të ndahej nga bashkëshortja e tij hungareze dhe në atë kohë për këtë gjë, ai gjeti edhe mbështetjen e vëllai të tij, i cili ishte ushtarak me gradën e kapitenit. Gjatë asaj bisede, Stavri i bëri të ditur vëllait për situatën tepër të vështirë në të cilën ndodhej, ku nuk përjashtohet mundësia që ai edhe të arrestohej. Pas kësaj, të dy vëllezërit vendosën që të arratiseshin nga Shqipëria. Qëllimi i tyre ishte që pas arratisjes, shteti shqiptar do të lejonte edhe bashkëshorten e Stavrit, Marien, që të largohej nga Shqipëria, për në atdheun e saj në Hungari. Por dëshira e tyre nuk u realizua, sepse në qershorin e vitit 1963, teksa Stavri së bashku me të vëllanë e dy shokë të tyre, tentuan të kalonin kufirin shtetërorë në zonën e Bilishtit, ata u kapën nga rojet e kufirit në afërsi të klonit, kur vetëm disa hapa i ndanin nga liria që kishin ëndërruar. Pas kësaj ata të dy u nxorën para gjyqit, që u zhvillua në Tiranë me dyer të hapura, ku u akuzuan për agjitacion e propagandë dhe për tradhti të lartë ndaj Atdheut. Si përfundim prokurori kërkoi që Stavri, të dënohej me 15 vite burg, kurse për vëllanë e tij ushtarak, dënimin me vdekje, gjë e cila u la në fuqi edhe nga trupi gjykues. Ndërsa i vëllai i tij oficer u pushkatua, Stavri, u dërgua të vuante dënimin si armik i popullit në kampet e punës së detyruar. Ndërsa bashkëshorten e tij hungareze, Marien, e internuan në qytetin e Fierit.
Pas burgut me Marien në Hungari
Mjeshtri i madh i skenës operistike shqiptare Stavri Rafaeli, e vuajti të gjithë dënimin si i burgosur politik në disa kampe e burgje dhe u lirua vetëm në vitin 1978. Ditën që do të lirohej, Stavrin e priti tek dera e burgut, bashkëshortja e tij, Maria, e cila pas dënimit të tij, jo vetëm që nuk e divorcoi, por përkundrazi e ndoqi bashkëshortin e saj shqiptar, në të gjitha kampet e burgjet dhe mbajti korrespodencë të rregullt me të, me anë të letrave. Për afro 27 vite, Maria punoi si mësuese muzike në një nga shkollat e Fierit, nën presionin e vazhdueshëm psikologjik të Sigurimit të Shtetit, që shpesh i kujtonte bashkëshortin e saj që ishte i dënuar si armik i popullit. Vetëm pas viteve 1990-të, ëndrra e Stavri Rafaelit u bë realitet. Ai me bashkëshorten e tij, Marian, u larguan nga Shqipëria dhe u vendosën në një qytet të vogël buzë liqenit Balaton të Hungarisë. Për kontributin e madh që Maria kishte dhënë në qytetin e Fierit, si mësuese e muzikës, në 7 mars të vitit 2001, Këshilli Bashkiak i Fierit i akordoi asaj titullin e lartë “Qytetare Nderi”. Këtë titull Maria erdhi dhe e mori vetë, në shenjë respekti, për atë qytet ku kishte kaluar pjesën më të madhe të jetës së saj dhe njerëzit e thjeshtë që e kishin respektuar, ndonëse bashkëshorti i saj ndodhej në burg si ”armik i popullit”./Memorie.al
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
