Dashnor Kaloçi
Memorie.al/publikon disa dokumenta të panjohura arkivore të nxjerra nga Arkivi Qendror i Shtetit në Tiranë, të cilat bëjnë fjalë mbi një korrespondencë midis Ministrisë së Punëve të Brendshme dhe asaj të Punëve të Jashtëm, në shkurtin e vitit 1937 me Konsullatën Mbretërore Shqiptare në Vjenë, lidhur me sigurimin e një kopje të pikturës së Skëndërbeut që ndodhej në Kështjellën Ambroso pranë Insbruk, të cilën qeveria shqiptare e Monarkisë së Zogut, kërkonte ta blinte me ndërmjetësinë e Drejtorit të Muzeut Nacional të Vjenës.
Me rastin e kremtimit dhe festimeve të mëdha që u zhvilluan nga qeveria Mbretërore e Monarkisë së Zogut në vitin 1938, më kuadrin e 470 vjetorit të vdekjes së Heroit tonë Kombëtar, Gjergj Kastrioti Skënderbeu, filluan kërkimet dhe u bënë të gjitha përpjekjet, që të gjendej edhe ndonjë pikturë e rrallë me portretin e tij, apo më saktë një kopje e pikturës origjinale, pasi deri në atë kohë shteti shqiptar nuk e dispononte një të tillë dhe portreti i Skënderbeut ishte vetëm në foto të bëra nga pikturat.
Kjo gjë veç të tjerash bëhet e ditur edhe nga një dokument arkivor i nxjerrë së fundi nga Arkivi Qendror i Shtetit, që i përket vitit 1937, ku ministri I Punëve të Brendshme, Musa Juka, me anë të një shkrese zyrtare i drejtohet Ministrisë së Punëve të Jashtme në Tiranë (që asokohe drejtohej nga Ekrem Libohova), për t’u interesuar lidhur me një portret origjinal të Skënderbeut, që ndodhej në Kështjellën e Ambeas, në Insbruk të Austrisë.
Dhe këtë gjë, pra sugjerimin e Ministrit të Punëve të Brendshme, Musa Juka, duket se Ministria e Punëve të Jashtme në Tiranë, i’a ka përcjellë menjëherë Konsullatës Mbretërore Shqiptare të Vjenës, gjë e cila duket edhe nga shkresa përcjellëse e Konsullit, Nikolla (Kol) Rrota, drejtuar Ministrisë së Jashtme në Tiranë, ku jep shpjegimet e rastit lidhur me pikturën e Skënderbeut si dhe shumën që duhej paguar, piktorit që do të realizonte kopjen e atij portreti, që për sigurimin e tij, kishte ndërmjetësuar edhe Drejtori i Muzeut Nacional të Vjenës. Për më shumë, na njohin dokumentet në fjalë që Memorie.al i publikon të plota në këtë shkrim.
Letra e Ministrit të Punëve të Brendshme, Musa Juka, për Ministrinë e Punëve të Jashtme në Tiranë, lidhur me pikturën e Skënderbeut në Vjenë
MBRETNIJA SHQIPTARE Tiranë, më 2.1.1937
MINISTRIA E P. TË MBRENDËSHME
ZYRA SEKRETE
Nr. 6 Res
MINISTRISË SË P. TË JASHTME
T I R A N Ë
LANDA;
Lutemi të keni mirësinë me i shkrue Konsullatës s’onë në Vien, për me u interesue edhe me marrë, nji kopje ashtu siç ashtë, një kopje me bojna të fotografisë së Skënderbeut qi gjindet në Kështjellin e Ambras n’Inbsbruk, edhe të dërgohet sa më parë që të jetë e mundun.
M I N I S T R I
Musa Juka
Letra e konsullit shqiptar në Vienë, Nikoll Rrota, për Ministrinë e Punëve të Jashtëme në Tiranë
KONSULLATA MBRETNORE E SHQIPNISË VJENË
Nr. 311/II Vjenë, më 17 fruer 1937
Shkurtimi: Gjegja e aktit Nr.A.III. 114/I. datë 9.I.1937.
Mbi kopjen e pikturës së Skënderbeut
Së ndershmes
Ministri Mbretnore të Punëvet të Jashtme
në T i r a n ë
Kemi nderin të njoftojmë, se jemi drejtue Administratës së kështjellit Ambras pranë Insbruck-u për sa i përket kopjes së pikturës origjinale të Skënderbeut qi ndodhet atje. Theksojmë se nuk asht nji fotografi, por nji pikturë autentike, dhe Administrata në fjalë na lajmnon, se mbrend atre javëve mund të nxjerret nji kopje me bojna prej nji piktori të përmendun në Insnsbruck, I cili kërkon 500. Shillinga Austrije (Fr.ar 312.50) dhe që na u rekomandue prej drejtorit të Muzeut nacional në Vjenë, z. Dr. August Gross.
Meqënse deri më sot nuk kemi nji pikturë autentike të Skënderbeut, siç është ajo e kështjellit në Ambras, do të ishte mirë që në bazë të kopjes të bahet nji reproduksion i sasishëm me bojna sikundër asht origjinali./Memorie.al
Me nderime të veçanta
Konsulli
Nikoll Rrota
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
