Dashnor Kaloçi
Pjesa e tridhjetë e nëntë
Memorie.al publikon disa dokumente arkivore të nxjerra nga institucioni i Autoritetit për Informimin e Dosjeve të ish-Sigurimit të Shtetit, ku ndodhet dosja voluminoze (formulare, hetimore dhe gjyqësore), e Myrteza Bajraktarit me origjinë nga Gostivari, i cili pasi mbaroi shkollën e mesme në qytetin e Tetovës, në vitin 1952, filloi studimet e larta në Universitetin e Shkupit, në degën e Filozofisë, ku krahas mësimeve ai u punësua edhe si gazetar në gazetën “Flaka e Vllaznimit” që botohej në Shkup, nga ku e largojnë shpejt, pasi botoi një artikull ku dilte hapur kundër shpërnguljes së shqiptarëve të Jugosllavisë për në Turqi dhe, si rezultat u emërua mësues në shkollën 7-vjeçare “Shaban Zeneli” të Kumanovës. Arrestimi i Myrtezait nga UDB-ja në vitin 1952, pasi ai bënte pjesë në një organizatë të fshehtë të quajtur, ‘Organizata Nacional-Demokrate Shqiptare’ dhe dënimi i tij me shtatë vite burg politik, të cilat i vuajti në burgun e Nishit dhe të Idrizovës. Arratisja nga Jugosllavia dhe ardhja në Shqipëri, ku pasi qëndroi disa kohë në kampin e internimit në Seman të Fierit, i’u dha e drejta e shkollës së lartë, duke u diplomuar në Universitetin e Tiranës në degën Gjuhë-Letërsi, por pasi refuzoi emërimin në qytetin e Beratit, në vitin 1971, arrestohet dhe dënohet me shtatë vite burg politik, me akuzën “agjitacion e propagandë”. Dalja nga burgu e lënia pa punë deri në shembjen e regjimit komunist dhe emërimi i tij si Konsull i Përgjithshëm i Shqipërisë në Zvicër, deri në vitin 1993, si dhe më pas zgjedhja e tij si Kryetar Nderi i Lidhjes Shqiptare në Botë, për vendet e Beneluksit, ku ai punoi për çështjen e Kosovës, deri sa u nda nga jeta më datën 11 dhjetor 2020. E gjithë dosja e plotë e Myrteza Bajraktarit, me emrat e funksionarëve dhe oficerëve të Sigurimit të Shtetit, pseudonimet e bashkëpunëtorëve, “kolegëve” e “bashkëpatriotëve” që e ndiqnin dhe survejonin, provokatorët në qelitë e hetuesisë, dëshmitarët që i dolën në gjyq, letrat dërguar Enver Hoxhës dhe instancave të larta zyrtare ku kërkonte pafajësinë e tij, etj., etj., publikohet për herë të parë nga Memorie.al
Dokumenti sekret me raportin e hartuar nga Punëtori Operativ Th. T., me të dhënat e bashkëpunëtorit të Sigurimit me pseudonimin “Shkëlzeni”, lidhur me bisedat që ai ka bërë me Selim Kelmendin, në qelitë e hetuesisë së Degës së Punëve të Brendshme të Krujës
Marrë nga P.O p. Th.T.
Dhënë nga B.p. “Shkëlzeni”
Raport i Dt. 1.11.1983
Burimi njofton se në datën 1.11.1983, kur Selimi u kthye në dhomë dhe e pyeti atë, po ti si e kalove në hetuesi, ke kohë që je kthyer nga hetuesia?! Ai ju përgjigj: ka një copë herë që më lëshoi hetuesi, më kërkoi ç’porosi më ka thënë Zefi dhe që ke kryer ti.
Unë i thashë hetuesit se, Zefi më ka thënë të shoqërohemi përditë bashkë, pasi mund të rrezikohem nga hasmi. Hetuesi më pyeti papandehur, Zefi me të cilët të arratisur është takuar në Jugosllavi? Unë u zura ngushtë dhe i thashë me Niman Kadriun e Shoshanit të Tropojës.
Hetuesi më tha: çka biseduar Zefi me Nimanin, unë ju përgjigja se, nuk di gjë më tepër. Hetuesi më tha, fol vetë e tregoji të gjitha, jo gjithmonë me të pyetur. Unë, tha hetuesi, dëshiroj që hetuesinë ta bëjmë bashkë në mënyrë paqësore, por kjo varet nga ti, sesi do reagosh ndaj fajësisë, mendohu dhe dua përgjigje.
Për këtë ik më tha, për këtë jam në hall e jemi ngatërruar keq. Selimi i tha atij që ke bërë keq që i ke thënë emrin e Nimanit. Kij parasysh herë tjetër kur të pyesi hetuesi mos ju përgjigj menjëherë por thuaji nuk më kujtohet.
Hajde në dhomë, mendohu mirë dhe pastaj jep përgjigje, siç do ti e jo siç do hetuesi. Selimi pyeti, Nimani a është takuar me Zefin, dhe ku jeton, a ka njeri këtu, etj. Ai i tha se Zefi ka ndenjur dy muaj me Nimanin në Plavë.
Nimani ka një vëlla me vete, kanë tokë e shtëpi. Selimi më tha se do të pyesi hetuesi, nëse ka ardhur Nimani dhe a është takuar me Zefin. A i ka dhënë ndonjë porosi vëllait të tij. Ai i tha se me të vërtetë ishte në hall. Në këtë kohë, Selimi nxori nga xhepi një letër me pyetje dhe ja lexoi atij, se me cilët persona ke biseduar ti Selim, për të realizuar detyrën kryesore, etj.
Ai i tha që ti Selim, je i fortë që i paske biseduar këto me gra si llafe pazari. Këtu nuk bëhet fjalë për një Kristinë, por për shumë gra. Kjo të paska prurë në burg ty. Ne nga malësia nuk ja lëmë punët grave. Këto janë punë burrash. Selimi i tha se unë nuk i kam bërë këto llafe pazari. Më vonë ai i tha Selimit, që ta nxirrte dhe njëherë letrën.
Ai e nxori dhe pasi u lexua nga të dy pyetja, rezultoi se bëhet fjalë jo për një, por për shumë persona. Jam në hall të madh tha Selimi. Ai më tha që pas disa ditësh, i kishte thënë hetuesve që po të doni ju, ju them dhe emra koti, por në atë çast hetuesit ishin prerë dhe i kishin thënë që t’ju tregonte për emrat që gjendeshin në dokument.
“Shkëlzeni”
Shënim: Myrteza Bajraktari është shok i ngushtë i Selimit, është emigrant kosovar dhe banon në Tiranë, ndiqet në 2/A nga Drejtoria e Punëve të Brendshme të Tiranës. Ndërsa Kristina Pali, jeton në Fushë Krujë.
Vlerësim: E dhëna ka vlerë operative pasi, Selimi mendon se hetuesit e kërkojnë për Myrteza Bajraktarin, përveç Kristinës në Fushë Krujë. Detyrën që B.p. ka konsumuar me Selimin, e ka kryer sipas porosisë sonë dhe kjo u dëgjua me T.O.
Detyra: Nuk ju dhanë pasi, nuk u mor në hetuesi.
Masat Operative: E dhëna të shtypet në katër kopje, një për Selimin, një për Myrteza Bajraktarin, një për Kristinën, dhe një për Degën e I-rë.
Me të dhënat, të njihen hetuesit e çështjes që të intensifikojnë hetimin ndaj Selimit. Meqë këto biseda pjesërisht janë dëgjuar me T.O., pasi të nxirret informacioni, të bëhet krahasimi me të dhënën.
Puntori Operativ
Th. T.
Dokumenti sekret me ekstraktin e hartuar në Punëtori Operativ, Simon Qirici, me të dhënat e bashkëpunëtorit të Sigurimit me pseudonimin “Galeci”, lidhur me bisedat që ai ka bërë me Myrteza Bajraktarin
Sekret
Tiranë më 11.11.1983
Ekstrakt
Nxjerrë nga raporti i “Galecit” datë 10.11.1983, për objektet Myrteza Bajraktari, Ahmet e Ismail Kelmendi.
Burimi thotë se njihet me Myrteza Bajraktarin, ka pasur muhabet me të por, pas burgut, Myrtezai i ka ndërprerë bisedat me burimin dhe me disa kosovarë të tjerë, duke thënë se: “shokët ma bënë të keqen”. Myrtezai rin më tepër me baxhanakun e tij, Ahmet Sadiku.
Ka në Shkodër dhe një baxhanak tjetër, Estref Kelmendin. Lidhur me Selim Kelmendin në Fushë Krujë, që është arrestuar kohët e fundit, burimi thotë se ai……………….!
Pra duhet të ketë diçka dhe me……………………..e arrestuar e ndoshta ky është pajtuar me pikëpamjet e plakës, për të zhvilluar veprimtari armiqësore. Vlerësimi dhe detyrat, ndodhen në raportin origjinal.
U shtyp në një kopje sipas origjinalit që ndodhet në dosjen e punës së agjentit “Galeci”.
Punëtori Operativ
Simon Qirici
Dokumenti sekret me ekstraktin e hartuar nga Punëtori Operativ, Sokrat Paskali, me të dhënat e bashkëpunëtorit të Sigurimit me pseudonimin “Furtuna”, nga qyteti i Shkodrës, lidhur me informatat që ai kishte për Selim Kelmendin dhe Myrteza Bajraktarin
Sekret
Ekzemplar
Shkodër më 22.11.1983
Ekstrakt
Detyrë e dhënë nga B.p. “Furtuna” datë 21.11.1983
Jam interesuar dhe për Selim Kelmendin. Është në burgun e Tiranës. Është i izoluar plotësisht. Vetëm 1 kg. biskota dhe sheqer, i lejohet t’i dërgohet nga bashkëshortja. Të shoqen në Fushë Krujë, e ka takuar Myrtezai. Edhe unë e kam takuar kur ka ardhur këtu.
Selimin e akuzojnë se ka mbajtur një djalë 12 vjeç. Ky djalë ka ardhur në Shqipëri pas demonstratave në Kosovë, dhe është vendosur në Shtëpinë e Fëmijës. Ai, është shumë i zgjuar dhe Selimi e ka mbajtur në shtëpinë e tij për disa muaj.
Për këtë, i ka shkuar Shaban Braha dhe i ka thënë që fëmija, duhet të rrijë atje ku është vendosur. Fëmija vetë, ka refuzuar që të rrijë në Shtëpinë e Fëmijës. Pas kësaj, është larguar dhe ka shkuar në Kosovë.
Atje, ka folur për pesë ditë në Radio, nga një orë në ditë. Këtu, e kanë incizuar dhe kanë arritur në konkluzionin se: materialin e ka përgatitur Selim Kelmendi, pasi ai si fëmijë, nuk ka pasur mundësi të përgatis materiale të tilla.
“Furtuna”
Shënim: Estref Kelmendi, Selim Kelmendi, dhe Myrteza Bajraktari, janë ndjekur e ndiqen në problemin “Gorrilla”, si agjentë të Zbulimit Jugosllav.
Vërtetohet njësh me origjinalin
Punëtori Operativ
Sokrat Paskali
Dokumenti sekret me ekstraktin e hartuar nga Punëtori Operativ, Sokrat Paskali, me të dhënat e bashkëpunëtorit të Sigurimit me pseudonimin “Furtuna”, nga qyteti i Shkodrës, lidhur me informatat që ai kishte për Selim Kelmendin dhe Myrteza Bajraktarin
Sekret
Ekzemplar
Shkodër më 26.11.1983
Ekstrakt
Nxjerrë nga raporti i B.p. “Furtuna”, datë 22.11.1983
Estrefi thotë se, Selimi është njeri shumë i mirë. Më vjen shumë keq për të, por nuk kemi se çfarë të bëjmë. Izolimi i tij i plotë dhe akuza për atë fëmijën, janë shumë të rënda. Kur isha në Tiranë, ngarkova me detyrë Myrteza Bajraktarin dhe Idriz Lleshin, që të shkonin në gjyq dhe të shikonin se për çfarë do të dënohej ai në gjyq. Aty ishte dhe Idriz Lleshi, shok i ngushtë i Myrtezait me të cilin, është njohur që në Jugosllavi.
“Furtuna”
Sqarim: Estref Kelmendi ndiqet në përpunim aktiv 2/A si agjent i mundshëm jugosllav në problemin e centralizuar “Gorrilla”.
Vërtetohet njësia me origjinalin
Punëtori Operativ
Sokrat Paskali
Dokumenti sekret me ekstraktin e hartuar nga Punëtori Operativ, Sokrat Paskali, me të dhënat e bashkpunëtorit të Sigurimit me pseudonimin “Furtuna” nga qyteti i Shkodrës, lidhur me informatat që ai kishte për Selim Kelmendin dhe Myrteza Bajraktarin
Sekret
Ekzemplar nr. 1
Shkodër më 26.11.1983
Ekstrakt
Nxjerrë nga raporti i b.p “Furtuna” datë 26.11.1983
Në datën 23.11.1983, burimi shkon në shtëpinë e Estref Kelmendit ku, pritja ju bë shumë e mirë. Mbasi filloi të shajë si zakonisht pasi në shtëpi nuk kishte njeri, Estrefi filloi të tregojë, për një shqetësim që kishte Myrteza Bajraktari, për të bijën. Gjatë kësaj bisede, ai tregoi se kishte takuar në Tiranë djalin e Rustem Gjatës.
Burimi e pyeti sesi është Rustemi me punë. Çfarë ka thënë për Selim Kelmendin. Selimi, më fliste për Rustemin me simpati, tregon burimi. Estrefi thotë se, Rustemi është njeri shumë i mirë. Burimi i thotë se: në ç’kuptim është i mirë Rustemi…?! Selimi e ka pasur shok të ngushtë. Nuk duhet t’i marrësh njerëzit ashtu.
Rustemi është njeri shumë i mirë. Por Selimi ka gabuar rëndë dhe këta, nuk ta falin. Në këto punë gabimi më i vogël, është si puna e korrentit. Burimi i thotë se, çfarë mund të ketë bërë tjetër Selimi, veç asaj historisë me atë djalin 12 vjeçar. Estrefi i thotë se: njerëzit tanë nuk janë prekur nga këto masa por, Selimi është futur në burg për agjitacion.
Shënim: Estref Kelmendi është në përpunim aktiv 2/A, si agjent i mundshëm i Zbulimit Jugosllav dhe ndiqet në problemin e centralizuar “Gorrilla”.
Puntori Operativ
Sokrat Paskali
Dokumenti sekret me ekstraktin e nxjerrë nga Punëtori Operativ i Degës së Punëve të Brendshme të rrethit të Lushnjes, Besim Veizi, lidhur me deponimet në gjyq të Hamza Nurçes, për Myrteza Bajraktarin
Sekret
Ekzemplar i vetëm
Tiranë më 22.11.1983
Ekstrakt
Nxjerrë nga shkresa e dërguar nga Degës së Punëve të Brendshme e Lushnjes, dërguar me nr.1113 datë 16.11.1983
Hamza Nurçe ndiqet në përpunim aktiv 2/A, si agjent i mundshëm i Zbulimit Jugosllav. Përsa kërkoni nga ana jonë, u lexuan një për një materialet që ndodhen në dosje dhe nuk rezulton që të bëhet fjalë për dërgimin e Myrteza Bajraktarit nga UDB-ja në Shqipëri. Në dosje ndodhet proces-verbali i pyetjes së Hamza Nurçes, si i pandehur.
Në datë 20.11.1968, ai ndër të tjera deponon: “Unë e di se Kapllan Resuli ka muhabete me Qerim Jakupin dhe Myrteza Bajraktarin, madje Myrtezai shkon gjithmonë në shtëpinë e tij. Për Myrteza Bajraktarin, më ka thënë Qerim Jakupi që është i pakënaqur sepse, në hetuesi i është çmendur një shok i tij që e kanë kthyer në Jugosllavi. Për këtë shkak është i pakënaqur ai. Memorie.al
Vërtetohet njësia me origjinalin
Punëtori Operativ
Besim Veizi
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
