Dashnor Kaloçi
Memorie.al publikon disa dokumenta arkivore të nxjerra nga Arkivi Qendror i Shtetit në Tiranë (fondi i ish-Komitetit Qendror të PPSH-së), të cilat i përkasin vitit 1963, ku sekretari i parë i Komitetit të Partisë së qytetit të Tiranës, Rrapo Dervishi, me anë të një raport-informacioni që mban siglën ‘Tepër sekret’, njofton sekretarin e Komitetit Qendror të PPSH-së, Rita Marko, “Mbi veprimtarinë armiqësore të muajve të fundit në qytetin e Tiranës”, ku jepen të dhëna të hollësishme rreth disa shtetaseve të huaja, kryesisht grave dhe vajzave polake, hungareze etj. Informacioni në fjalë është parë dhe sigluar edhe nga Enver Hoxha, i cili ka vënë një shënim për të hetuar hungarezen, Kloreta Nano, (bashkëshortja e Dr. Kosta Nano, mjek në Spitalin Ushtarak), e cila ka thënë se: “Në Shqipëri është krijuar një situatë e rëndë sa që njeriu nuk guxon t’i flasë tjetrit të vërtetën. Organet shqiptare nuk i lejojnë përfaqësuesit hungarezë të bredhin lirisht për të sqaruar masat. Enver Hoxha dhe Mehmet Shehu janë nga më injorantët, sepse nuk e kuptojnë situatën dhe hidhen kundra Hrushovit, por do të shohin se Hrushovi nuk ka vepruar akoma. Hrushovi dhe Tito janë burra shteti nga më të mëdhenjtë që po të shpëtojnë njerëzimin, janë tejpamës dhe se bota duhet të krenohet për këto, etj,…”!
Shprehja e njohur e Leninit se: “Çdo komunist është një çekist”, duket që ka gjetur zbatim sa më mirë me komunistët e organizatës bazë të partisë të lagjes nr. 5, në qytetin e Tiranës në vitin 1963, të cilët në mënyrë vullnetare, kanë bërë detyrën e punonjësve të Sigurimit të Shtetit, duke ndjekur, survejuar, e mbledhur të dhëna, për disa shtetase të huaja, që ishin asokohe në Tiranë. Kjo gjë del dhe bëhet e qartë nga një raport-informacion i sekretarit të parë të Komitetit të Partisë, së qytetit të Tiranës, Rrapo Dervishi, dërguar Rita Markos, i cili në atë periudhë kohe, mbante detyrën e sekretarit të Komitetit Qendror të PPSH-së, për organet e “Diktaturës së Proletariatit”. Në raport-informacionin në fjalë, nga komunistët e asaj organizatë bazë, janë mbledhur një sërë të dhënash, “për veprimtarinë armiqësore” që zhvillonin disa vajza dhe gra të huaja, kryesisht polake, hungareze etj., të cilat ishin pjesë e trupit diplomatik të akredituara në Shqipëri. Si p.sh., vajza e atasheut tregtar polak, (nxënëse te gjimnazi “Sami Frashëri”), apo ishin martuar me shqiptarë, si p.sh., agronomja hungareze, Edi Çeliku, punonjëse në Ndërmarrjen e Pastrim-Gjelbërimit të Tiranës dhe Kloreta Nano, bashkëshortja e doktor Kosta Nanos, asokohe mjek, në Spitalin Ushtarak të Tiranës. Siç thotë dokumenti në fjalë (dhe faksimilet përkatëse), pasi ka marrë raport-informacionin, sekretari I Komitetit Qendror të PPSH-së, Rita Marko, i’a ka dërguar atë Enver Hoxhës, i cili ka vënë aty shënimet përkatëse për secilin rast. Ndryshe nga rastet e vajzës gjimnaziste të atasheut tregtar polak apo agronomes Edi Çeliku, (e martuar me shqiptar), ku për “veprimtarinë armiqësore” të tyre, Enveri nuk ka shënuar asgjë, në rastin e hungarezes Kloreta Nano, ai ka shkruar: “Të hetohet pasi e tillë do jetë”. Kjo, pasi ai nuk ja ka falur asaj fjalët e thëna për të se: “Enver Hoxha dhe Mehmet Shehu janë injorantë, sepse nuk po e kuptojnë situatën, ndërsa Tito dhe Hrushovi janë burra shteti të mëdhenj që po shpëtojnë njerëzimin dhe bota do të krenohet për këta…”. Shkrimi në fjalë me dokumentet arkivore, publikohet nga Memorie.al
Raport-informacioni i Rrapo Dervishit për Rita Markon
PARTIA E PUNËS SHQIPËRISË Tepër Sekret
Tiranë, më 4.II.1963
KOMITETI I PARTISË QYTETI TIRANE
Nr. i Prot. 121
Lënda: Dërgohet një informacion
KOMITETIT QENDROR TE PPSH
Shokut Rita Marko
T I R A N E
Ngjitur po ju dërgojmë një informacion që i ka ardhur Komitetit të Partisë nga Xhemile Korbi, komuniste në Ministrinë e Punëve të Jashtme.
Ne muarëm këto masa:
Thirrëm sekretarin e organizatës bazë të partisë të lagjes Nr. 5, për të parë se deri ku është shtrirë veprimtaria armiqësore e kësaj në vendin e banimit, me cilin ka marrëdhënie kjo familje dhe kush hyn e kush del.
Njoftuam Drejtorinë e Punëve të Brendshme për të parë këtë problem nëpërmjet kanaleve të punës së saj.
Një kopje e informacionit iu dërgua Drejtorisë Politike të Ushtrisë për të parë punën e kapiten Kosta Nanos si mjek në Spitalin Ushtarak.
Kaq për dijeni.
SEKRETARI I KOMITETIT TE PARTISË TE QYTETIT TIRANES
(Rrapo Dervishi)
Informacioni mbi shfaqjet armiqësore në qytetin e Tiranës
PARTIA E PUNËS SHQIPËRISË Tepër Sekret
KOMITETI I PARTISË QYTETI
TIRANE
Ekzemplar Nr.
INFORMACION MBI DISA SHFAQJE ARMIQËSORE TE VËRTETUARA MUAJT E FUNDIT NE QYTETIN E TIRANES
Gjatë muajve të fundit të këtij viti Komiteti i Partisë ka marrë disa informacione nga organizatat e partisë me anë të të cilave vihemi në dijeni për disa lloje dhe forma të veprimtarisë armiqësore të shprehura me gojë, me anë parullash të shkruara nga persona të ndryshëm nëpër muret si dhe takime të dyshimta që kanë bërë element me përbërje jo të mirë, këtu poshtë po shënojmë disa nga këto të dhëna:
- Propaganda armiqësore me gojë
Gruaja e Doktor Kosta Nano, e quajtura Kloreta Nano, me nënshtetësi Hungareze, në takime me gra të ndryshme shqiptare thotë se: Në Shqipëri është krijuar një situatë e rëndë sa që njeriu nuk guxon t’i flasë tjetrit të vërtetën. Organet shqiptare nuk i lejojnë përfaqësuesit Hungarezë të bredhin lirisht për të s’kjaruar masat. Enver Hoxha dhe Mehmet Shehu janë nga më injorantët sepse nuk e kuptojnë situatën dhe hidhen kundra Hrushovit, por do të shohin se Hrushovi nuk ka vepruar akoma. Hrushovi dhe Tito janë burra shteti nga më të mëdhenjtë që po të shpëtojnë njerëzimin, janë tejpamës dhe se bota duhet të krenohet për këto, etj komente me karakter armiqësor. Në të gjitha rastet nga shoqet ajo ka marrë përgjigjen e merituar. Me sa dimë, kohët e fundit ajo ka kërkuar për t’u larguar për në Hungari.
Mbi sa sipër kemi njoftuar Komitetin Qendror të Partisë më datën 4. II. 1963. Nga ana jonë u muarrën masa për të rritur vigjilencën e organizatës së Partisë në Lagjen Nr. 5. Gjithashtu u ngarkua Drejtoria e Punëve të Brendshme për të ndjekur çështjen e qytetares hungareze. Për të parë qëndrimin e Kosta Nanos, ish-mjek në Spitalin Ushtarak, u vu në dijeni Drejtoria Politike e Ushtrisë Popullore. Kohët e fundit, Kosta Nano është çmobilizuar nga Ushtria dhe u caktua mjek në Poliklinikën e qytetit.
Në fidanishten e ndërmarrjes lokale të pastrim gjelbërimit punon një agronome Hungareze, që quhet Edi Çeliku, edhe kjo duket se aktivizohet nga ana e ambasadës Hungareze. Tek ajo ka pasur raste që kanë shkuar punonjës të ambasadës. Gjatë ditëve që pati konfuzion në ndarjen e bukës, e cila në takime me punëtorët, u bënte pyetje, nëse e siguruan bukën apo jo. Është porositur organizata bazë e partisë që të tregoj kujdes lidhur me qëndrimin e saj.
Një veprimtari jo më pak armiqësore është duke zhvilluar vajza e atasheut tregtar polak, e cila vazhdon klasën e X-të në gjimnazin e ri “Sami Frashëri”. E përmendura propagandon në favor të revizionizmit dhe godet direkt vijën ekonomike dhe politike që ndjek e zbaton partia jonë. Ajo thotë: “Po të ndiqni rrugën kineze, kurrë nuk keni për të ndërtuar socializmin”. Është vërtetuar të ketë shpënë revista me artisë dhe artiste të huaja dekadente, bën gjeste imoraliteti e propagandon kudo duke folur për dashuritë dhe mbrëmjet që frekuenton ajo me përfaqësues të ambasadave Jugosllave, Egjiptiane etj. Jo pa qëllim ajo qëndron në bankë në pozicion provokues ndaj nxënësve dhe ju u thotë se jam revizioniste etj. Këto ditë u përjashtua fare nga shkolla./Memorie.al
SEKRETARI I KOMITETIT TE PARTISË TE QYTETIT TIRANES
(Rrapo Dervishi)
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
