Nga Neritan Kolgjini
Memorie.al / Sot ishte përvjetori i ndarjes nga jeta i nënës sime. Prej ditësh mendohem se çfarë me shkrue për te. Nji tekst, enkas për këtë ditë, nuk m’u duk ndonji gja me vlerë. Mendoj se ia vlen ma shumë diçka që tërheq njëherësh edhe vëmendjen e miqve, por edhe të atyne që nuk e njohin. Kjo ide m’u përforcue edhe prej faktit që para pak ditësh kam apliku të Autoriteti i Dosjeve për dokumentacion të mundshëm rreth nanës sime. Unë zotnoj aktualisht nji numër të kufizuem dokumentesh disa prej të cilëve i kam publikue edhe herë të tjera.
Sot këtu po jap të plotë nji dokument, që e kam gjetur te dosja e nji miku të familjes sime, Eqerem Mujos, në të cilin jepet në njëfarë mënyre edhe opinioni i regjimit komunist për njerëzit e mi.
Në këtë shkrim, si foto janë edhe kartelat e Sigurimit të Shtetit, që kishin vue në ndjekje nanën time Qefseren, bashkë me hallën time, Feriden, qysh prej vitit 1974, saktësisht 20.02.1974. Kartelat mbajnë numrat 573 e 574.
Ajo që ka ma shumë rëndësi në gjithë këtë histori, asht fakti që regjimi nuk persekutonte e përndiqte individë, por familje. Edhe këto pak dokumente që po publikoj këtu, e dëshmojnë saktësisht këtë qasje diabolike. Ma poshtë, dokumenti i vitit 1987, i zbardhur nga dosja e Eqerem Mujos.
RAPORT-INFORMACIONI I ZV/KRYETARIT TË DEGËS SË BRENDSHME TË LUSHNJES, DILEVAR BALLILI, DËRGUAR MINISTRISË SË BRENDSHME ME TË DHËNAT PËR FAMILJEN E TAHIR KOLGJINIT
REPUBLIKA POPULLORE SOCIALISTE E SHQIPËRISË SEKRET
MINISTRIA E PUNËVE TË BRENDSHME Ekzemplar Nr.1
DREJTORIA E PUNËVE TË BRENDSHME Lushnje më 29.6.1984
ANA E SIGURIMIT
Nr. Prot. 18/1
LËNDA; Mbi Qefsere Kolgjinin
MINISTRISË SË PUNËVE TË BRENDSHME
DREJTORISË SË PARË
DEGËS SË V
TIRANË
Gjegje tuajës nr. 797/3 datë 28/3/1984
Nga verifikimi që i kemi bërë, Qefsere Kolgjini është e shoqja e Ahmet Kolgjinit, i cili është dënuar për aktivitet armiqësor. Ahmet dhe Ferdide Kolgjini janë fëmijët e Tahir Kolgjinit, i cili është arratisur dhe ka vepruar si diversant kundër vendit tonë. Ndërsa Refat Kolgjini, nuk njihet nga ana jonë.
ZV/KRYETARI I DEGËS SË P. TË BRENDSHME
DILAVER BALILI
RAPORTI I PUNËTORIT OPERATIV TË SIGURIMIT BUJAR PREZA, ME TË DHËNAT E AGJENTIT “VJOSA’, PËR BISEDAT QË KA BËRË ME EQEREM MUJON DHE PERSONAT QË KANË HYRË NË SHTËPINË E TIJ
Sekret
Marrë nga P.Op. Bujar Peza
Dhënë B.p. “Vjosa”
Në bazën “Filmi”
Lushnje, më 22.4.1987
Raport i datës 22.4.1987
Burimi njofton se është takuar me Eqerem Mujon, ku gjatë bisedave ai e pyeti se si e ke babanë, a ke marrë vesh ndonjë lajm. Eqeremi tha se me letra jam marrë vesh dhe babai më ka ndihmuar me dollarë, por qeveria shqiptare nuk i ka dhënë lekët, aq sa më takojnë.
Ai njofton se me datë 18.4.1987, ai pa se në shtëpinë e Eqerem Mujos, erdhi për vizitë Feride Kolgjini së bashku me Qefsere Kolgjinin, por se çfarë bisedash kanë bërë, ai nuk di gjë.
“Vjosa”
Sqarim: Eqerem Mujo është në përpunim aktiv 2/A si agjent i Zbulimit grek. Feride Kolgjini është e motra e Ahmet Kolgjinit, ndërsa Qefserja, është e shoqja e tij, që të dyja të evidencuara në kontingjent.
Vlerësim: E dhëna ka vlerë vetëm për fiksim lidhje familjare të Eqerem Mujos me Ahmet Kolgjinin, gjë që hedh dyshime se si familje janë në aktivitet të përbashkët armiqësor.
Detyra: Është interesant Eqerem, se e fortë shumë ka qëndruar Ferideja dhe Qefserja, se Ahmeti me gjithë se bëri 10 vjet burg, mbrapa i kanë shkuar. Por do të thuash se burrë e vëlla e kanë, por ka nga ata që të lënë dhe në rrugë.
Masat Operative: E dhëna të shtypet dhe të vendoset në dosje të E. Mujos dhe A. Kolgjinit. Të drejtohet B.p. “Luani” për të mësuar karakterin e këtyre lidhjeve të Ahmetit me Eqeremin. / Memorie.al
Punëtori Operativ
Bujar Peza
