Dashnor Kaloçi
Pjesa e dytë
Memorie.al publikon disa dokumenta të panjohura të nxjerra nga Arkivi i Ministrisë së Punëve të Jashtme në Tiranë, të cilat i përkasin vitit 1990, ku ndodhet një korrespodenca e ambasadës shqiptare në Romë, me Ministrinë e Punëve të Jashtme në Tiranë, ku ambasadori shqiptar, Dashnor Dervishi, informon ministrin Reiz Malile dhe eprorët e tjerë të tij në Tiranë, lidhur me letrën e dërguar pranë asaj përfaqësie diplomatike nga ana e Sekretarit të Shtetit të Vatikanit, Kryepeshkopit, Angelo Sordano, i cili shprehte dëshirën për të ardhur vetë në Shqipëri, me qëllim për të takuar ish – priftin katolik, Monsinjor Nikolla Troshanin, i cili pasi kishte kaluar vite të tëra në burgjet e regjimit komunist të Enver Hoxhës, në atë kohë punonte në bujqësi në fshatrat e rrethin të Lezhës. Korrespodenca e plotë në mes ambasadës shqiptare në Romë dhe titullarëve më të lartë të Ministrisë së Punëve të Jashtme në Tiranë, ku përveç interesimit të madh, të shfaqur nga Vatikani për ish – Peshkopin, Nikolla Troshani me të cilin ata kishin humbur çdo lidhje, që nga koha e burgosjes së tij dhe nuk dinin nëse ai jetonte ende, si dhe përgëzimet ndaj qeverisë shqiptare, për pritjen që i bëri Nënë Terezës, ambasadori Dervish i bën me dije eprorëve të tij, se dy profesorët e Teologjisë në Universitetin e Romës, Andrea Rikardo dhe Damako në Universitetin e Barit, i kishin thënë se: Vatikani po shfaqte interesim të madh, për zhvillimet në Shqipëri dhe veprimtarinë e saj në arenën ndërkombëtare, ku në mënyrë të veçantë Selia e Shenjtë, po shprehte interes për integrimin e Shqipërisë në KSBE dhe po ndërhynte pranë qeverive të Europës Perëndimore, që të mbështesë hyrjen e saj në KSBE, para se të mblidhej konferenca e Helsinkit, etj., e deri tek përpjekjet e ambasadorit shëtitës të Vatikanit në vendet e Europës Lindore, Kolosuono, i cili i kishte konfirmuar se Vatikani kishte përgatitur dyzet peshkopë shqiptarë nga Kosova, në shkollat e Romës dhe po bëhej gati të krijonte diogjenezën me qendër në Prishtinë, që do të varej direkt nga Roma.
Telegram i ambasadorit shqiptar në Romë, Dashnor Dervishi, dërguar Ministrisë së Punëve të Jashtme në Tiranë, lidhur me interesimin dhe ndërhyrjen e Vatikanit pranë qeverive të vendeve të Europës, për pranimin e Shqipërisë në Këshillin e Sigurimit dhe Bashkëpunimit Europian, si dhe problemin e Nikolla Troshanit, ish-Ipeshkv i Tiranës dhe Durrësit
D Ë SH I F R I M
sh. Ramiz, sh. Hekuran, sh. Adil
Nr. 22117 Nga: Roma
Nr. 1313 Data: 5.8.1990
MINISTRISË SË JASHTME
Profesorët e Teologjisë në Universitetin e Romës, Andrea Rikardo dhe Damako në Universitetin e Barit, më thanë se Vatikani po shfaq interesim të madh për zhvillimet në Shqipëri dhe veprimtarinë e saj në arenën ndërkombëtare. Në mënyrë të veçantë Vatikani shpreh me interes integrimin e……
(vijon)
D E SH I F R I M
Nr. 22118 Nga: Roma
Nr. 1314 Data: e dyta
….Shqipërisë në KSBE dhe po ndërhyn pranë qeverive të Europës Perëndimore, që të mbështesë hyrjen e Shqipërisë në KSBE, para se të mblidhet konferenca e Helsinkit. Sipas ambasadorit shëtitës të Vatikanit në vendet e Europës Lindore, Kolosuono, Vatikani ka përgatitur dyzet……
(vijon)
D Ë SH I F R I M
Nr. 22119 Nga: Roma
Nr. 1315 Data: e treta
….peshkopë shqiptarë nga Kosova, në shkollat e Romës dhe po bëhet gati të krijojë diogjezën, me qendër në Prishtinë, që do të varet direkt nga Roma. Në këtë kuadër Vatikani ka vendosur të hapi arkivat e saj, duke u vënë në dispozicion studiuesve shqiptarë….
(vijon)
D Ë SH I F R I M
Nr. 22120 Nga: Roma
Nr. 1316 Data: e katërta
….dokumenta që kanë të bëjnë me Shqipërinë, duke filluar që nga viti 1920 e këtej. Synimi është që të vërtetohet historikisht lashtësia e kristianizmit në trojet shqiptare. Kolasuono ka premtuar të nxjerrë e…..
(vijon)
D Ë SH I F R I M
Nr. 22121 Nga: Roma
Nr. 1317 Data: e pesta
….të dorëzojë një kopje të Mesharit të Gjon Buzukut. Sipas Kolasuonos, qëndrimi i Vatikanit do të sensibilizohej akoma më shumë, ndaj Shqipërisë, nëse nga autoritetet shqiptare do të bëhej ndonjë xhest, për të dhënë ndonjë informacion për gjendjen e ish peshkopit të…..
(vijon)
D Ë SH I F R I M
Nr. 22122 Nga: Roma
Nr. 1318 Data: mbaroi
…..Durrësit, Nikolla Troshani, me të cilin Vatikani, ka humbur çdo lidhje dhe nuk di se ku ndodhet, nëse është gjallë, etj.
Dashi
Telegram i Ministrisë së Punëve të Jashtme në Tiranë dërguar ambasadorit Dashnor Dervishi në Romë, lidhur me përgjigjet që duhet t’i jepte ai Vatikanit, për Nikolla Troshanin
SH I F R I M
Nr. 2978 Data: 13.8.1990
Adresa: Ambasadës Romë
Koncepti: Tuajit nr. 1313
Profesorëve Andrea Rikardo e Bamako, që u interesuan për gjendjen e ish peshkopit të Durrësit Troshani, u thoni se është mirë dhe se jeton me të afërmit e tij në rrethin e Lezhës. Siç ju kemi komunikuar edhe më parë, nëse nga ana e Vatikanit, kërkohet t’i komunikohet priftit në fjalë ndonjë mesazh, ju përgjigjuni…..
SH I F R I M
Nr. 3644/3645 Datë: 6.10.1990.
Adresa: Ambasadës Romë
Koncepti: Ambasadori italian De Andreis, na kërkoi në emër të 12-shes, që t’i jepnim shpjegime lidhur me tre persona të tyre, të burgosur politik, për të cilët u interesua dhe trojka gjatë vizitës këtu. Ai përmendi gjithashtu dhe kërkesën për t’u lidhur me ish – Peshkopin, Troshani. Ambasadori theksoi se në bazë të ndryshimeve në Kodin Penal, ligjet tona, nuk duhet të ketë asnjë të burgosur politik por vetëm të burgosur ordinerë. Neni për propagandën, është hequr.
Telegram i ambasadorit shqiptar në Romë, Dashnor Dervishi, dërguar Ministrisë së Punëve të Jashtme në Tiranë, për vizitën që i kishte bërë pranë asaj selie diplomatike profesori i Universitetit të Romës, Andrea Rikardi, i cili i kishte shprehur përgëzimet e Vatikanit për reformat që po bënte qeveria e Tiranës drejt demokratizimit të vendit
D Ë SH I F R I M
Nr. 29153 Nga: Roma
Nr. 1805 Data: 9.11.1990
MINISTRISË SË JASHTME
Profesori i Teologjisë në Universitetin e Romës, Andrea Rikardi më tha se kishte takuar Soldanon (MPJ i Vatikanit). Ai kishte vlerësuar vendimet e fundit të marra në Shqipëri, si një hap pozitiv e kurajoz në drejtim të demokratizimit të jetës. Më tej ai shtoi se Soldano i ka kërkuar….
(vijon)
D Ë SH I F R I M
Nr. 29838 Nga: Roma
Nr. 1818 Data: 18.11.1990
MINISTRISË SË JASHTME
….Prof. Katapano, i tha Gjovalinit se në rrethet e larta të Vatikanit dhe të tjera është mirëpritur fjala e shokut Ramiz Alia, lidhur me ndryshimet në kushtetutë për qëndrimin ndaj fesë, etj. Tha se Monsinjor Fortino dhe kardinalët e tjerë të asaj selie, janë të mendimit se Shqipëria po bën hapa të matura e të vendosura drejt demokratizimit.
D Ë SH I F R I M
Nr. 30117 Nga: Roma
Nr. 1830 Data: 21.11.1990
MINISTRISË SË JASHTME
Rev. Dr. Glen Garfield Vilshims, ish sekretari i përgjithshëm ekonomik i kishave, aktualisht në pension, më bëri një vizitë në ambasadë. Në vazhdim të korrespondencës që kemi me të ai propozoi, që të vijë në Shqipëri në 17 dhjetor, së bashku me të shoqen. Do të qëndrojë 3-4 ditë….
(vijon)
D Ë SH I F R I M
Nr. 30118 Nga: Roma
Nr. 1831 Data: e dyta
Të gjitha shpenzimet e qëndrimit ai i përballon vetë. Dëshira e tij është që gjatë kësaj vizite private në Shqipëri, të njihet me vlerat kulturore të vendit tonë, duke përfshirë dhe ato me përmbajtje fetare, si dhe proçesin aktual të zhvillimeve në Shqipëri. Lutet që gjatë qëndrimit aty, të shoqërohet nga një person kompetent që ta ndihmojë për të organizuar vizitat dhe ndonjë takim me Komitetin Kulturor.
(vijon)
D Ë SH I F R I M
Nr. 30119 Nga: Roma
Nr. 1832 Data: mbaroi
Mendojmë që kërkesa e tij të plotësohet, pasi është një person me influence, në rrethet fetare dhe institucionet ndërkombëtare me karakter social-politik. Lutemi na autorizoni, për dhënien e vizës për të komunikuar me përfaqësinë tonë në Gjenevë, për ta tërhequr atje, pasi është me banim në Gjenevë.
Dashi
SH I F R I M
Nr. 4187 Data 13.12.1990
Adresa: Ambasadës Romë
Koncepti: Tuaji Nr. 1805
Në rast se nga ana e Vatikanit ju kërkojnë përsëri që të dorëzojnë përshëndetjen e Papës, për priftin Troshani, merreni atë dhe u thoni se do t’ja dorëzojmë të adresuarit
D Ë SH I F R I M
Nr. 29154 Nga: Roma
Nr. 1806 Data: mbaroi
atij që të ndërhyjnë edhe njëherë pranë ambasadës sonë për të pranuar një letër përshëndetje nga ana e Vatikanit, për t’ja përcjellë priftit Nikolla Troshani. Prof. Rikardi pret përgjigje nga ana jonë, nëse e marrim përsipër këtë punë.
Dashi
Letra e ministrit të Punëve të Jashtme, Reiz Malile, drejtuar ministrit të Punëve të Brendshme, Hekuran Isai, lidhur me letrën që ministri i Jashtëm i Vatikanit, i ka dërguar Nikoll Troshanit, ish-Ipeshkvit të Durrësit dhe Tiranës, i cili banonte në rrethin e Lezhës
Shoku Hekuran
Ashtu sikurse biseduam bashkëlidhur, po ju dërgojmë një zarf që Ministri i Jashtëm i Vatikanit i dërgon Nikolla Troshanit. Veçmas ju dërgoj dhe një fotokopje për juve të përkthyer dhe në shqip. Përpara se të veprohet, është mirë që të njiheni me përmbajtjen e letrës.
Reiz Malile
Tiranë më 24 dhjetor 1990
Letra e ministrit të Punëve të Jashtme, Reiz Malile, dërguar ambasadës shqiptare në Romë, për letrën e Vatikanit dërguar ish – Ipeshkvit të Durrësit dhe Tiranës, Nikolla Troshanit
SH I F R I M
Nr. 4291 Data: 27.12.1990.
Adresa: Ambasadës Romë (shokut Dashnor)
Koncepti: Letra që dërguat për priftin Troshani, i’u dorëzua të interesuarit nga Komiteti Ekzekutiv i Lezhës./Memorie.al
Reiz
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
