Dashnor Kaloçi
Pjesa e njëzetetre
Memorie.al/ publikon disa dokumente arkivore të nxjerra nga institucioni i Autoritetit për Informimin e Dosjeve të ish-Sigurimit të Shtetit, ku ndodhet dosja voluminoze (formulare, hetimore dhe gjyqësore), e Myrteza Bajraktarit me origjinë nga Gostivari, i cili pasi mbaroi shkollën e mesme në qytetin e Tetovës, në vitin 1952, filloi studimet e larta në Universitetin e Shkupit, në degën e Filozofisë, ku krahas mësimeve ai u punësua edhe si gazetar në gazetën “Flaka e Vllaznimit” që botohej në Shkup, nga ku e largojnë shpejt, pasi botoi një artikull ku dilte hapur kundër shpërnguljes së shqiptarëve të Jugosllavisë, për në Turqi dhe si rezultat, u emërua si mësues në shkollën 7-vjeçare “Shaban Zeneli” të Kumanovës. Arrestimi i Myrtezait nga UDB-ja në vitin 1952, pasi ai bënte pjesë në një organizatë të fshehtë të quajtur, ‘Organizata Nacional-Demokrate Shqiptare’ dhe dënimi i tij me shtatë vite burg politik, të cilat i vuajti në burgun e Nishit dhe të Idrizovës. Arratisja nga Jugosllavia dhe ardhja në Shqipëri, ku pasi qëndroi disa kohë në kampin e internimit në Seman të Fierit, i’u dha e drejta e shkollës së lartë, duke u diplomuar në Universitetin e Tiranës në degën Gjuhë-Letërsi, por pasi refuzoi emërimin në qytetin e Beratit, në vitin 1971, arrestohet dhe dënohet me shtatë vite burg politik, me akuzën “agjitacion e propagandë”. Dalja nga burgu dhe lënia pa punë deri në shembjen e regjimit komunist dhe emërimi i tij si Konsull i Përgjithshëm i Shqipërisë në Zvicër, deri në vitin 1993, si dhe më pas zgjedhja e tij si Kryetar Nderi i Lidhjes Shqiptare në Botë, për vendet e Beneluksit, ku ai punoi për çështjen e Kosovës, deri sa u nda nga jeta më datën 11 dhjetor 2020. E gjithë dosja e plotë e Myrteza Bajraktarit, me emrat e funksionarëve dhe oficerëve të Sigurimit të Shtetit, pseudonimet e bashkëpunëtorëve, “kolegëve” e “bashkëpatriotëve” që e ndiqnin dhe survejonin, provokatorët në qelitë e hetuesisë, dëshmitarët që i dolën në gjyq, letrat dërguar Enver Hoxhës dhe instancave të larta zyrtare ku kërkonte pafajësinë e tij, etj., etj., publikohet për herë të parë nga Memorie.al
Dokumenti sekret i hartuar nga shefi i Bazës së Vëzhgimit të Sigurimit të Shtetit, Llambi Jano, dërguar Punëtorit Operativ, Haxhi Dashi, me raport-survejimin mbi lëvizjet e Myrteza Bajraktarit dhe gruas së tij, Kimete Berisha, nëpër rrugët e qytetit të Tiranës
DREJTORISË SË TIRANËS SEKRET
HAXHI DASHIT Ekzemplar
E përkohshme
Tiranë, më 8/11/1974
RAPORT SURVEJIMI MBI LËVIZJET E OBJEKTIT MYRTEZA BAJRAKTARI
i cili do të njihet me pseud. “Balashi”
Datë 6/XI/1974
Në orën 19.00 filloi survejimi në Rrugën “Naim Frashëri” para Drejtorisë së Punëve të Brendshme të Tiranës: Në orën 19.30, objekti doli nga Drejtoria e Punëve të Brendshme e Tiranës e kaloi në Rrugën “Sami Frashëri”, “Myslym Shyri”, “4 Shkurti” dhe në ora 19.36 fute në WC të Parkut “Rinia”, brenda nuk u kontrollua, pas 02. del që këtej dhe kalon në Rrugën “4 Shkurti”, dhe në ora 19.40 futet në P.T.T. qendrore, brenda nuk u kontrollua, por u pa nga jashtë që shkoi në sallën e bisedimeve telefonike, pas 02, objekti doli dhe qëndroi para P.T.T. dhe në ora 19.50 takohet me një person që do të njihet me pseudonimin “Gici”, me banim në Rrugën “Luigj Gurakuqi”, si përshëndetën duke zënë duart dhe si bisedojnë për 02, “Gici” ndahet duke zënë duart dhe kalon në drejtime të ndryshme. Ndërsa objekti qëndron në vend, në orën 19.58, futet në P.T.T., në sallën e bisedimeve telefonike, këtu takohet me gruan e tij dhe bisedojnë midis tyre. Mandej të dy futen në një nga kabinat telefonike dhe bisedojnë me Shkupin.
Në ora 2014, të dy dalin nga P.T.T. dhe kalojnë rrugës para Teatrit të Kullave, e qëndrojnë në pritje në stacionin urban. Në ora 20.16 objekti dhe gruaja e tij hipin në autobusin që sapo erdhi dhe kalojnë në rrugën para Teatrit të Kullave, “4 Shkurti”, “Myslym Shyri”, “Sami Frashëri”, “Muhamet Gjollesha”, e në ora 20.27., autobusi qëndron në afërsi të P.T.T., së lagjes Nr.8, këtu zbresin dhe të dy kalojnë përmes pallateve (rrobaqepësia e pallatit tjetër), në drejtim të shtëpisë së tij. Prej kësaj ore deri në ora 22.00, që vazhdoi survejimi, objekti nuk është parë të dalë nga drejtimi i shtëpisë së tij. Në këtë kohë, survejimi u ndërpre.
Datë 7.11.1974
Në ora 6.00 filloi survejimi në pritje të daljes të objektit në rrugën “Muhamet Gjollesha”, nga drejtimi i shtëpisë së vjehrrit, te i tij, në ora 7.25, objekti u pa në Rrugën “Muhamet Gjollesha”, duke ardhur nga drejtimi i shtëpisë së vjehrrit të tij, objekti ishte shoqëruar me gruan e tij, e që të dy, vazhdojnë ecjen në Rrugën “Muhamet Gjollesha”, rrugën “Gjin Bue Shpata”, kapërcejnë urën e Lanës dhe dalin në rrugën “Marsel Kashen”, para ekspozitës së “Progresit Teknik”, vazhdojnë ecjen kësaj rruge, “Sami Frashëri”, e në ora 7.35, objekti futet në Drejtorinë e Punëve të Brendshme të Tiranës, ndërsa gruaja kalon në drejtime të ndryshme, në ora 7.55, objekti del nga kjo Drejtori, vazhdon ecjen Rrugë “Sami Frashëri”, “Myslym Shghyri” e “4 Shkurti”, “Konferenca e Pezës” e në ora 8.00 futet në Gjellëtoren që ndodhet mbrapa pikës së karburantit, brenda nuk u kontrollua, po u pa nga jashtë, që diçka hante, në ora 8.10, del që këtej e kalon rrugës “Konferenca e Pezës”, “Kongresi i Përmetit”, “Bulevardi Stalin”, Rruga “Barjam Curri”, e në ora 8.15, futet në Gjellëtoren e Vetëshërbimit, që ndodhet ngjitur me Hotel “Tirana”, brenda nuk u kontrollua, në ora 8.25, del që këtej e kalon rrugës “Bajram Curri|, “Barrikada”, në ora 8.35, objekti futet në WC e Sheshit “Partizani”, për 02, del që këtej e kalon po Sheshin “Partizani”, rrugën “Barrikada”, “Bajram Curri”, “bulevardi Stalin”, Sheshin “Skënderbe” e në ora 8.45, ndalon në pritje të autobusit, te Stacioni i Tiranës së Re, për 05, vjen autobusi në të cilin hipën objekti, autobusi niset, për 05, minuta qëndron autobusi tek stacioni karshi P.T.T.-së të Lagjes Nr. 8, nga i cili zbret objekti, vazhdon ecjen rrugës “Muhamet Gjollesha”, e në ora 9.00 merre drejtimin për në shtëpinë e vjehrrit të tij, në ora 9.50, objekti u pa duke ardhur nga drejtimi të Rrugës “Muhamet Gjollesha” e në ora 9.52, objekti i hipën autobusit te stacioni përballë Gjelltores, i cili niset rrugës “Muhamet Gjollesha”, “Miqësia”, “Bulevardi Dëshmorët e Kombit”, Sheshi “Skënderbe”, “Bulevardi Stalin”, e në ora 10.10, autobusi qëndroi tek stacioni i fundit (Maternitet), këtu zbret objekti, i cili vazhdoi ecjen, Bulevardit “Stalin”, Rruga “Skënder Kosturi” dhe në ora 1012, shkon e pret biletë tek treni, në këtë kohë, objekti shkon e hipën tek treni që shkonte për në Fier. Në ora 1020, treni niset, e survejimi i objektit, në këtë kohë u ndërpre.
Dkt. K.C. Kopje 2 Shefi i Bazës
Llambi Jano
Dokumenti sekret i hartuar nga shefi i Bazës së Vëzhgimit të Sigurimit të Shtetit, Llambi Jano, ku sqarohet që personi që personi të cilin e ka takuar Myrteza Bajraktari, i shënuar me pseudonimin “Gici”, të vihet me emrin e plotë, Xhevit Çaushi
SEKRET
Ekzemplar
E përkohshme
Tiranë, më 15/11/1974
Shënim për objektin “Balashi”
Në raportin e datës 6.11.1974, ku bëhet fjalë për takuesin me pseudonimin “Gici”, të shënohet emri i tij i plotë, Xhevit Çaushi, banues në Rrugën………..
Shefi i Bazës
Llambi Jano
Dhënë B.p. “Patrioti”
Marrë, P.Op. Haxhi Dashi
Nëpërmjet rezidentit “Plazhi”
Dt. 29/4/1975
Më datën 24/4/1975, ai u takua me Myrteza Bajraktarin, i cili i tha se akoma nuk është sistemuar në punë. Nga Komiteti Ekzekutiv i rrethit, kishte marrë përgjigje kohët e fundit me shkrim, se “nuk ka vend pune, as në arsim dhe as në administratë”. Tani rri në pritje, me shpresë se më vonë do të rregullohem në ndonjë punë.
Shokët e Ministrisë së Punëve të Brendshme, më kanë dhënë shpresë se do të sistemohem në ndonjë punë, por tani për tani duhet pritur edhe ca. Nga motra në Shkup, kam marrë lajme dhe ata janë gjithnjë në merak të punës sime. Dhe këtë verë, shpresojmë që të vijë përsëri mysafir, por, kam frikë se do të më gjejë përsëri të pasistemuar.
U nisa njëherë që t’i drejtohesha organeve kompetente për të kërkuar pafajësinë, por e lashë këtë edhe njëherë.
“Patrioti”
Detyra:
- Mundohuni që takimet me të, të mos jenë të rastit. I thuaj se babai i tij, ka dëshirë të rrijë me kosovarët. Tani që je akoma pa vendosur në punë, eja andej nga shtëpia.
- Po qe se të jepet rasti, i thuaj, sa për vendosje në punë, tash për tash, me këto që po shohim, është e vështirë, edhe unë nuk e kam të sigurt, nëse ngelem aty, apo jo. Ti duhet me kërku të vendosësh diku në prodhim.
“Plazhi”
Punëtori Operativ
Haxhi Dashi
Ekstrakt letre
Dërguesi: M. Bajraktari
Marrësi: Asim Alemdani
Turna Carsici Nr. 269-E
Maltepe – Cervizli – Stamboll
I dashur vëlla.
Morra kartolinën tënde nga Stambolli. U gëzova…se për një kohë të gjatë, na u ndërpre korrespodenca. Na duhet të kujtojmë njeri-tjetrin, qoftë dhe me kartolinë. Ti gjithnjë ke qenë dhe je shumë korrekt në korrespodencë. Ne të tjerët, lëmë për të dëshiruar, me fjalë të tjera, jemi “imallxhi”…! Se besoj të ketë njeri që të ndjej nevojën se sa unë të ndonjë lajmi nga njerëzit tanë të afërt.
I dashur vëlla, më vjen shumë mirë që tani ke shumë mundësi të shëtisësh dhe t’u bësh nga një vizitë, njerëzve tanë që gjenden në Turqi dhe gjetkë. Mbase do të gjesh rastin për të ardhur këtu, siç më ke shkruar disa herë, verën e kaluar kur ishte këtu Myneseri, më shkruaje se do të vije nga vjeshta, por nuk e di, pse e le pas dore këtë punë. Në rast se ardhja jote mund të dëmtojë sadopak, mos eja, ne jemi mirë, mallin zhuritës dimë ta përballojmë.
Ju urojmë suksese në mbrojtjen e magjistraturës në orientalistikë.
Të fala nga Kimetja dhe Albasha.
30/4/1975 M. Bajraktari
Dhënë: B.p. “Flamurtari”
Marrë nga P.Op. H. Dashi
Në Bazën “Shkrimtari”
Dt. 8/5/1975
R A P O R T
Më datën 15/4/1975, ai u takua me Agim Gjakovën, Gani Demirin, Namik Lucën, Myrteza Bajraktarin, në kafe “Drini”. Ganiu, e pyeti Myrtezain, se si i kishte hallet dhe ç’i kishin thënë për punë. Myrteza Bajraktari, u përgjigj: “Asgjë. Komiteti Ekzekutiv më dha përgjigje negative, duke më thënë se; në Arsim dhe punë zyre nuk ka. Më mbetet vetëm varianti i pensionit politik, siç marrin emigrantët e moshuar, 400 lekë.
Dërgova një shokun tim te shefi i Financës, pranë Komitetit Ekzekutiv, shefi pasi e kishte dëgjuar shokun tim, ishte përgjigjur: “Myrtezai, me invaliditet të klasit të II-të apo të III-të, përfiton, por duhet të na sjellë një shkresë nga organet kompetente”.
Unë, vazhdon Myrtezai, isha në Ministrinë e Punëve të Brendshme, u takova me …………………ai më tha se çështjen time ja kishin lënë, për kompetencë, Kryetarit të Degës. E kam kërkuare disa herë, por nuk më del.
Gani Demiri tha: “Nëse të duhet ndonjë dëshmitar, për të kaluarën tënde, ja, ku na ke ne të katërve, ne vijmë ku të duash ti.
Ai ndërhyri: “Kjo duhet menduar, po i përmendi emrat tanë për dëshmi, mos i prish punë vetes”.
Namik Luca tha: “Myrteza, përse nuk e rrit moshën, thuaj se jam 55 vjeç, të dalim ne në gjyq, kështu mund të përfitosh pension”.
Kaluan në bisedat e tjera. M. Bajraktari, zuri në gojë një farë Rexhë Çerkini, (ka vdekur në 1979), me të cilin, kishte jetuar në Seman të Fierit. Tha: “Njeri më të ndyrë dhe më kriminel, se Rexhë Çerkini, nuk kam parë. Ua nxirrte maceve sytë. Nëse ziheshim dy veta, i ndihmonte më të fuqishmin. Njëherë, desh ta verbonte shokun tonë në gjumë. E pashë unë, njoftova Ahmet Sadikun dhe e kapën, e rrahën mirë. Kur ishte arratisur Rexha nga Kosova, hetuesi, e kishte pyetur, përse ishte arratisur. Ai kishte thënë: “Nëna po lante plaçkat në Drin, i kishte rënë ajo gjëja e grave, prandaj kam ardhur ta kërkoj”.
Ai e plotësoi: “Rexh Cerkini, është nga rrethi i Suharekës. E ka varë babain, prandaj është arratisur. Të paktën kështu thoshte Rexha”. Në vazhdim ai tregoi se si ishin emigrantët që gjendeshin në Seman.
Ganiu pyeti atë: “Sa vjet qëndrove në Seman”? Ai i’u përgjigj: 2 vjet. Pastaj vazhdoi: Në Seman kishte kriminelë, hajdutë, etj. Njëherë më erdhi një telegram nga nëna: “Më lajmëro për shëndetin”, shkruante nana. Unë e futa telegramin në xhep. Një farë Xhafer Mehmeti, më afrohet e më pyet: Çfarë të solli postieri? Unë i’u përgjigja: Nanën e kam sëmurë në spitalin e Prizrenit. Ajo kërkon që të shkoj për dy tre ditë, vallë a më japin leje?
Xhaferi zgurdulloi sytë dhe pyeti: “Për ku, për Prizren”? Po, iu përgjigja unë. Tri ditë dhe kthehem prapë. Xhaferi u ngrit, e iku. Kishte njoftuar policinë. Polici erdhi më pyeti, unë i thashë po ato fjalë që ja kisha thënë Xhaferit, i cili më tha: “Ke luajtur ti. Prizreni është përtej kufirit”?!. Unë i thashë: vetëm tre ditë më jepni leje, prap kthehem, ju betohem.
Që të katërt qeshën. Ai sajoji edhe ndonjë tjetër si kjo. Namik Luci, tha: “Përse nuk shkruan një roman për Mat’hauzenin? Ke material nga Semani që ja kalojnë. Vetëm ngjarjen vendosi në Mat’hauzen”.
Ai tha se bën edhe disa biseda pa rëndësi.
“Flamurtari”
Detyrë:
Janë ato që janë përcaktuar në vijë sjellje.
Masat Operative: E dhëna të shtypet në katër kopje, një nga të cilat t’i dërgohet degës së Punëve të Brendshme Krujë./Memorie.al
Punëtori Operativ
Haxhi Dashi
Vijon numrin e ardhshëm
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
