Nga Suela Musta
Memorie.al / Mes bashkëvuajtësve, familjarëve, fisit, miqve dhe përfaqësuesve të politikës së djathtë, mirditori nga Oroshi, Nikollë Prenga Tuci, i cili ka vuajtur mbi 25 vite në burgjet e “gulagut” komunist, festoi këto ditë 90 vjetorin e lindjes. “Ne dhe bashkëvuajtësit e mi në Spaç Reps, Qaf-Bar, Kampi i Tepelenës etj., që jemi ende gjallë, gëzojmë dhuratë nga Zoti. Komunistët na torturuan dhe na shkaktuan vuajtje të paimagjinueshme ndër breza ne mirditorëve”, – shprehet z. Nikollë.
Në qendër të pushkatimeve vrasjeve pa gjyq dhe torturave çnjerëzore të komunistëve, ishin familje mirditore të cilat kishin luftuar kundër serbëve dhe njiheshin si konakë të patriotizmit. I tille ishte dhe fisi Preng Tuci nga Oroshi i Mirditës, i cili kishte njohur persekutimin e egër serb e, më pas atë diktaturës komuniste.
Nikolla vuajti gjatë në kampet e punës së rëndë dhe burgjeve të Burrelit, Spaçit etj., ku arriti të dilte i gjallë falë genit të fortë të malësorit, mbështetjes së familjes dhe bashkëvuajtësve.
Prej viteve ’90-të ai, gëzon status të veçantë të luftëtarit të lirisë dhe demokracisë, në Belgjikë ku jeton me bashkëshorten e tij, mësuesen e nderuar nga Rrësheni, znj.Terezinë dhe familjarët e tjerë të tij.
Në 90 vjetorin e lindjes, z. Nikollë Preng Tuci, mori certifikatën e mirënjohjes me të cilën u vlerësua nga kryetari i Bashkisë së Rrëshenit, z. Albert Melyshi, me motivacionin; “Për rezistencë heroike ndaj persekutimit komunist, duke i dhënë edhe më shumë nderim krahinës së trimave dhe patriotizmit, Mirditës”
Ndërkohë po në ceremoninë e ditëlindjes, z. Tuci mori edhe një çertifikatë mirënjohje nga Shoqata e ish të Persekutuarve Antikomunistë, si dhe shumë vlerësime nga bashkëvuajtësit e tij. Memorie.al
