Nga Namik Mehmeti
Memorie.al/ Kjo fotografi e viteve ’60-të është realizuar në Rrëshen të Mirditës, kur ekipi “Minatori” i këtij qyteti, merrte pjesë në kategorinë e tretë në kampionatin kombëtar të volejbollit. Në përbërje të tij janë një grup arsimtarësh, disa prej tyre ishin nga Shkodra. Ato kishin luajtur me ekipet e të rinjve të Vllaznisë, por kur kishin pretenduar të luanin në ekipet e para, për arsye biografie, ishin braktisur si të padëshiruar, për njolla në biografi. Kështu ka ndodhur me sportistët e talentuar shkodranë, si: Skënder Sinani, Xhelal Haxhi, Skënder Mehmeti, Gjovalin Dredhaj, Çezar Çefa etj.
Në vitin 1964, Rrësheni, pra “Minatori”, u shpall kampion në kategorinë e tretë, që u zhvillua në Peshkopi. Pjesëmarrja e “Minatorit” të Rrëshenit, nuk ishte planifikuar nga Federata Shqiptare e Lojërave me Dorë. Mbas një takimi me ish drejtuesin e kësaj Federate, N. Kadiu, një emër i respektuar dhe shumë dashamirës, për të zgjeruar hartën e këtyre aktiviteteve deri në Mirditë, autorin e këtyre radhëve i dha mundësinë e një takimi me Kryetarin e Komitetit Shtetëror te Sporteve, Vasil Konomin. Vasili mbasi dëgjoi emrat e sportistëve të lartë përmendur, ku në ekipin e “Minatorit” bënin pjesë edhe sportistë të njohur, që kishin luajtur me “Studentin” si, ing. Gjeollog, Ibrahim Shkreli etj., pa asnjë mëdyshje e miratoi pjesëmarrjen e “Minatorit” në këtë aktivitet.
Përse këto talente sportive nuk ishin të preferuar për Shkodrën, pra për “Vllazninë”?! Njollat në biografi i detyronin të braktisnin ëndrrën e tyre rinore, për t’u afirmuar si sportistë. Skënder Sinani që në bankat e Shkollës Pedagogjike në Shkodër, falë edhe shtatët lartësisë trupore, trajnerët e përfshinë në formacionin e parë, duke treguar vlerat e vërteta të një shuteri potent. Por babai i tij Hamdi Sinani, në vitet e Monarkisë së Zogut, kishte qenë Qark-Komandant, në disa qytete të vendit dhe me ardhjen e komunistëve në pushtet, ai u dënua si “armik i popullit”. Me gjithë ndërhyrjet e drejtuesve të “Vllaznisë” e të trajnerëve, Komiteti i Partisë jepte orientimin se: ‘ky emër nuk është i denjë për të përfaqësuar “Vllazninë”.
Po kështu ka ndodhur edhe me një tjetër talent sportiv, Skënder Mehmeti, ku trajnerët e ekipeve të të rinjve të “Vllaznisë”, prof. Feti Dizdari, prof. Esat Haxhi, trajneri i futbollit i mirënjohuri Xhelal Juka, këmbëngulnin që t’a rreshtonin, i pari në atletikë, i dyti ne basketboll dhe Juka në futboll. Bëhet fjalë për vëllain tim, Skender Mehmeti. Ishte i lindur për t’u bërë një sportistë me emër. I pëlqeu më shumë basketbolli dhe për këtë ishte i bindur edhe trajneri i “Vllaznisë”, Esat Haxhi, i cili i hapi rrugën e afirmimit. Në bankat e shkollës se mesme Pedagogjike, në vitin 1958, Skënderi ishte fitues i Kupës së Shqipërisë me “Vllazninë”, përkrah mjeshtërve të njohur si Muhamet Sokoli, Vullnet Ademi, Luan Shatku, Skënder Osmani, Agim Quku, etj., dhe bashkëmoshatarëve, si V. Kalaja, L. Tarri, Z. Çoba, F. Karafili etj. Traineri Esat Haxhi bëri të pamundurën për t’a emrue mësues në Shkodër, por me urdhër tē Sul Bahollit e Qamil Peshqeshit, u anullue emrimi i tij.
Në Rrëshen ku punoi për pesë vite, e vuajti shumë largimin nga “Vllaznia” dhe jeta nuk i’u pri mbarë, pasi depresioni bëri efektin e tij. Dhe gjithë ky keqtrajtim, vinte se babai ynë, si nënpunës i Monarkisë Zogiste, (prefekt, n/prefekt, kryetar komune nga Vermoshi në Jergucat), u dënua si “armik i popullit”, me 10 vite burg.
Xhelal Haxhi edhe pse ishte një emër i njohur në sportin shqiptar, me “Studentin” në volejboll, edhe pse ishte i vëllai prof. Esat Haxhit, Shkodra, kuptohet Komiteti i Partisë, nuk ndërhyri për ta emruar mësues në qytetin e tij, ku me të rinjtë e “Vllaznisë”, ishte shpallur edhe kampion kombëtar, përkrah emrave të njohur, si Ali Bushati, Vuktor Jubani, Ndoc Pistulli etj.
Edhe familja Haxhi ndiqej nga një njollë në biografi, pasi babai i tyre kishte qenë nëpunës i Monarkisë Zogiste. Xhelali edhe atëherë kur i’u hap drita jeshile, për të përfaqësuar ngjyrat e “Vllaznisë” nuk i deshtë fati të vazhdonte më tej karrierën tij sportive. Ai u përfshi në ekipin e qytetit të tij të dashur, “Vllaznia”, në turneun miqësor në Kosovë, në vitin 1968, ku dihet reprezaljet që ndërmori Partia e Sigurimi i Shtetit, jo vetëm ndaj volejbollit shkodran, por edhe të gjithë ekipeve sportive, ku e pësoi edhe ekipi i futbollit, i cili u përjashtua nga Kupat e Europës. Të tre këto sportistë të talentuar, që ishin dhe shokë të ngushtë, ndonëse me ardhjen e demokracisë gjetën mirëpritjen e shokëve të tyre tek “Vllaznia”, sidomos të Mark Grimcit, që kishte luajtur me këto në ekipet e të rinjve, e më vonë në rolin e inspektorit e të shefit të Klubit Vllaznia. Për fatin e keq të tyre e të familjeve të tyre, këto tre shokë të ngushtë ndërruan jetë në moshën më të bukur, pa gëzuar atë fitore të demokracisë, kur diktatura komuniste u kishte mohuar ëndrrat e dëshirat e tyre për sportin.
Po kështu kishte ndodhur edhe me një tjetër talent sportive, Çezar Çefa, pasi kishte një vëlla të arratisur, Jul Çefa, ish atlet i “Vllaznisë”, po me kampionin kombëtar të hedhjes të shtizës, mjeshtrin e sportit, Llesh Vuksani, atleten kampione në atletikë Fozilet Luli (Burazeri) të cilët hoqën dorë nga sporti për arsye biografie. Vitet që këto sportistë kaluan në Mirditë, ndonëse kishin mbrapa shpine një “njolle”, i’u dha mundësia për t’u marrë me sport, pavarësisht kushteve të vështira ekonomike e sociale, sportistët shkodranë kontribuuan shumë për zhvillimin e sportit në këtë krahinë, kjo falë edhe mbështetjes së seksionit të Arsimit e Kulturës, veçanërisht të një inspektori sportdashës, si Prend Jaku dhe ish – shefit të Arsimit, Çesk Kumrija. Por nuk duhet mohuar edhe kontributi i sportistëve mirditorë, që u krijuan shokëve të tyre nga Shkodra, një mjedis të ngrohtë. Kujtoj këtu emrat e Preng Përgjetani, prof. Ndue Toma, Namik Ruçi, Dritan Arapi etj./Memorie.al
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
