Tiranë, 19 Shkurt 2020
Këshilli i Ambasadorëve Shqiptarë përshëndet rezultatet e Konferencës Ndërkombëtare të Donatorëve ” Të gjithë bashkë për Shqipërinë”
Këshilli i Ambasadorëve Shqiptarë (KASH) përshëndet rezultatet e Konferencës Ndërkombëtare të Donatorëve “Të gjithë bashkë për Shqipërinë” të zhvilluar më 17 Shkurt në Bruksel, ku premtua shifra rekord e donacioneve prej 1,15 Miliard Euro, të cilat mbulojnë dëmet materiale në zonat ku goditi tërmeti tragjik i datës 26 Nëntor 2019.
Kjo Konferencë me jehonë në politikën, publikun dhe median ndërkombëtare dëshmoi sërish se aleatët tanë të mëdhenj, Bashkimi Evropian, SHBA-të organizatat më të mëdha ndërkombëtare financiare dhe shumë partnerë të tjerë nga e gjithë bota iu ndodhën pranë popullit dhe vendit tonë dhe gjatë atyre momenteve tejet të vështira e në vazhdim.
Zhvillimi i kësaj Konference në Bruksel, nën kujdesin e drejtpërdrejtë të Presidentes së re të Komisionit Europian, Ursula von der Leyen, Presidentit të Këshillit Charles Michel dhe me mbështetjen e plotë të Parlamentit Evropian, pas publikimit më 5 Shkurt të Metodologjisë së re të Zgjerimit drejt Ballkanit Perendimor dhe mesazhet premtuese për çeljen e negociatave tregojnë qartë dhe bindshëm se të gjitha vendet antare të BE-së, pavarësisht ndonjë rezerve të çastit, janë dashamirës dhe mbështetës të antarësimit të vendit tonë dhe të rajonit.
Ky solidaritet i jashtëzakonshëm ngroh zemrat dhe ngjall shpresa të mëdha te gjithë populli ynë, e në radhë të parë për ato mijra familje shqiptare të prekura më rëndë nga tërmeti i 26 Nëntorit.
KASH i bashkohet mirënjohjes dhe falenderimeve për të gjitha vendet donatore, pa përjashtim dhe organizatat e tjera ndërkombëtare për solidaritetin e shfaqur qysh më 26 Nëntor dhe bujarinë e jashtëzakonshme të treguar dhe më 17 Shkurt në Bruksel.
Falenderime të veçanta shkojnë për vëllezërit tanë të Kosovës dhe për të gjitha vendet fqinje.
Me këtë rast, Këshilli i Ambasadorëve Shqiptarë përgëzon, qeverinë dhe të gjitha institutionet e vendit, të përfshira aktivisht në këtë proces, ambasadat dhe Përfaqësitë tona diplomatike, për sensibilizimin e komunitetit ndërkombëtar dhe të çdo vendi mbi pasojat tragjike të tërmetit të 26 Nëntorit, lobimin efektiv dhe bashkëpunimin e frutshëm me agjencitë ndërkombëtare për vlerësimin e saktë të dëmtimeve dhe shkatërrimeve të mëdha.
Merita të mëdha me ndihmesën e tij të çmuar ka dhe komuniteti shqiptar kudo në botë, me personalitetet dhe sidomos artistët e tij të njohur. Në imazhin tejet pozitiv të shpalosur për vendin tonë me këtë rast pati ndikimin e vet të madh edhe konsensusi politik mbarëpartiak dhe bashkëpunimi ndërmjet të gjithë aktorëve dhe faktorëve të tjerë institucionalë, brenda dhe jashtë vendit.
Duke vlerësuar pozivisht këtë ngjarje me rrjedhoja të pritshme pozitive, KASH mendon gjithsesi se nuk ka kohë dhe arsye për eufori, propagandë dhe protagonizëm; përkundrazi, të gjithë e sidomos qeveria dhe agjencitë e saj ndodhen përpara sfidës dhe përgjegjësisë akoma më të madhe historike që në vazhdën e bashkëpunimit me organizmat ndërkombëtare dhe donatorët të bëjnë pa vonesa dhe me profesionalizëm saktësimin e kategorive të donacioneve, në grante, hua dhe kredi bashkë me specifikimet teknike; sidomos të kredive të premtuara që duket se zenë peshën më të madhe të shumës prej 1,15 miliard Euro.
Mbi këtë bazë, të realizohet sa më parë disbursimi i fondeve, sipas destinacionit dhe dhe projekteve përkatëse.
Ashtu siç u theksua dhe nga Presidentja e Komisionit Evropian dhe Komisioneri i Zgjerimit, në bashkëpunim me agjencitë e specializuara kërkohet detyrimisht eficiencë, por mbi të gjitha transparencë maksimale, me qëllim që të shmanget çdo shfaqje korrupsioni, për të mos kompromentuar dhe cënuar suksesin historik i 17 Shkurtit.
Duke shprehur besimin e tij të plotë, KASH kërkon nga Qeveria dhe agjencitë e saj përkatëse që të bëjnë gjithçka, që ky rast madhor solidariteti të kthehet në një histori të vërtetë suksesi të administrimit dhe menazhimit efektiv.
Këshilli i Ambasadorëve Shqiptarë
