Dashnor Kaloçi
Memorie.al publikon dokumentin arkivor nga fondi i ish-Komitetit Qendror të PPSH-së, me letrën e Sejfulla Malëshovës, dërguar Enver Hoxhës në vitin 1961 nga qyteti i Fierit ku ai ishte i internuar dhe punonte si magazinier, ku i kërkonte që t’i njihej vjetërsia e punës për kohën që kishte punuar në ish-Bashkimin Sovjetik dhe në Francë në sekretariatin e Internacionalistes Komuniste dhe në bazë të këtyre të shikohej mundësia e dhënies së pensionit të pleqërisë, gjë të cilën Komiteti i Partisë dhe ai Ekzekutiv i Fierit, nuk ja kishin aprovuar duke i thënë se “kishte ndryshuar qëndrimin politik”?!
Nga qyteti i Fierit ku e kishin degdisur si punëtor dhe magazinier që nga viti 1950-të, pas mos marrëveshjeve që kishte pasur me Enver Hoxhën, Sejfulla Mëlshova detyrohet që t’i shkruaj përsëri ish “shokut të tij të armëve”.
Pasi kishte prekur dekadën e gjashtë të jetës së tij, por me plot ulje dhe ngritje, nga që nga karakteri thuhej se ishte rebel dhe idealist i pandreqshëm, duke provuar si emigracionin politik për vite jashtë atdheut, ashtu dhe majat e pushtetit, si deputet, ministër dhe kryetar i Lidhjes së Shkrimtarëve dhe Artistëve të Shqipërisë, aty në barrakën ku jetonte, krejt i vetëm (rrethanat e jetës nuk ia mundësuan krijimin e një familje), ka filluar të plotësojë dokumentet për pensionin e pleqërisë.
Pasi ka shkruar disa letra në adresë të autoriteteve lokale të rrethit të Fierit dhe ka marrë përgjigje negative, është detyruar që t’i shkruaj personalisht vetë Enver Hoxhës, por duke mos i kërkuar asnjë lëmoshë apo favor?! Thjesht që t’i jepej e drejta që i takonte në bazë të ligjeve në fuqi. Në letrën e tij, nuk ka munguar të shkruaj: “Nuk e kam tradhtuar kurrë partinë dhe atdheun tim”, gjë të cilën me shumë gjasa duket që Malëshova e ka nxjerrë nga zëmra, pasi i tillë ishte vërtet, një “idealist i pandreqshëm”….?!
Ndërsa tradhtarë, ishin të tjerët…dhe koha tregoi se nuk kishte gabuar?! Nisur nga këto dhe plot gjëra të tjera që ndanin hendekun e madh me ish-shokët e tij të armëve, nuk dihet me saktësi se sa ka besuar vetë Sejfullai në zgjidhjen e problemit për të cilën edhe po i shkruante direkt ish shefit të tij të dikurshëm, por çuditërisht ai ka marrë një përgjigje pozitive dhe problem i pensionit i është zgjidhur. Duket se Enver Hoxha kësaj radhe kishte vënë dorën në zëmër dhe si rrallë ndonjëherë po u përgjigjej pozitivisht ish-shokëve të tij të idealit dhe armëve, me të cilët tashmë i kishte ndarë rrugët njëherë e përgjithmonë.
Kjo gjë bëhet e ditur edhe nga këto dokumente arkivore, ku autorit të poezisë së njohur “Përse e dua Shqipërinë”, nënshkruar me pseudonimin letrar, Lame Kodra, i është akorduar pensioni që i takonte edhe në bazë të ligjeve në fuqi.
Por atë pension ai nuk mundi ta gëzonte më shumë se dhjetë vite, pasi në vitin 1971, në rrethana ende të paqarta, aty në “Barrakën Nr. 1” të qytetit të Fierit, mbylli sytë përgjithmonë duke u ndarë nga kjo jetë që ai, qoftë si fanolist, antizogist, komunist apo demokrat-liberal, ia kishte kushtuar të gjithën Shqipërisë.
Letra e Sejfulla Malëshovës për Enverin
SEKRETARIATIT TE KOMITETIT QENDROR TE PPSH
TIRANE
(Shokut Enver Hoxha)
Unë i nënshkruari Sejfulla Malëshova, magazinier në Fier, kam nderin t’ju parashtroj lutjen si më poshtë:
Jam 61 vjeç dhe sipas ligjës, kam të drejtë të dal në pension.
Po të punoj, me pension të plotë, marr dhe 2. 000 lekë përmbi rrogën. Jam në gjendje të punoj dhe vetëm rroga e vogël më shtyn të kërkoj pension dhe kështu u hodha lutje dhe kërkova të më njiheshe koha kur kam punuar jashtë Shqipërisë, sikurse e parashikon edhe vetë ligja e pensioneve, Komiteti Ekzekutiv i K.P. të rrethit të Fierit, duke përdorur të drejtën e tij, nuk ma njohu këtë kohë si vjetërsi pune, duke thënë se ”ka ndryshuar qëndrim politik”. Kjo do të thotë se qëndrimi im politik ka ndryshuar në parim: kam luftuar dhe kam punuar për këtë republikë dhe për këtë parti një kohë, por tani nuk jam me këtë pushtet dhe me këtë parti.
Kjo nuk është e vërtetë. Unë kam bërë shumë gabime, por për një gjë të cilën nuk e kam bërë dhe nuk do ta bëj kurrë, të tradhtoj vendin tim dhe partinë time. Kam dyzet vjet që punoj, në këtë rrugë dhe ka ardhur koha që të bindet për këtë gjë edhe Komiteti Ekzekutiv i K.P. të rrethit të Fierit. Unë nuk kërkova pension patriotik apo pension për merita shërbimi, por pension pleqërie.
Në Bashkimin Sovjetik nuk kam punuar vetëm si komunist shqiptar, por edhe si punonjës. Në Francë lashë punën dhe shkova, siç e di këtë shoku Enver Hoxha, në post të Sekretariatit të Internacionales Komuniste. Partia jonë besoj se e njeh këtë punë si një punë që ka lidhje me të. Prandaj unë iu luta këtij sekretariati dhe personalisht shokut Enver, të paktën që të njihet koha kur unë kam qenë në Francë (1939-1941) dhe në Shqipëri përpara çlirimit (1943-1945), duke më dhënë një vërtetim për pjesëmarrjen time në luftën nacional-çlirimtare.
Kjo më mjafton për të marrë pension të plotë.
Me shpresë se kjo lutje e ime do të merret parasysh
Me respekt
Sejfulla Malëshova
Lagjia 18 Tetori, Barraka Nr.1
Fier
……………………………………………………………………………………………………………………………………………………
Shënimi mbi letrën e Sejfulla Malëshovës
Me porosi të shokut Enver, u njoftua sekretari i parë I K.P. shoku Pirro Gusho, ta thërrasin Sejfulla Malëshovën dhe ta njoftojnë se shoku Enver e morri letrën e tij, dhe për çështjen që ngre t’i drejtohet Kryeministrisë e do të shikohet në mënyrë të favorshme për të./Memorie.al
30.8.1961
Merr pensionin në rregull
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
