Nga Dashnor Kaloçi
Pjesa e shtatë
Memorie.al / Që nga viti 1944, kur erdhi në pushtet e, deri në fundin e vitit 1990-të, regjimi komunist i diktatorit Enver Hoxha dhe pasardhësit të tij Ramiz Alia, në bazë të teorisë dhe “mësimeve të Marksit, Engelsit, Leninit e Stalinit” si dhe ideologjisë që ata ideuan e u aplikua gati në gjysmën e botës, zhvilluan pa ndërprerje luftën e klasave, duke ekzekutuar, burgosur apo internuar kundërshtarët e tyre politikë. Në këtë kuadër, që nga dhjetori i vitit 1944, kur Enver Hoxha dhe qeveria që ai kryesonte zbritën nga malet dhe morën pushtetin, krahas ekzekutimeve me dhe pa gjyq, filluan edhe internimet e dhjetëra e qindra familjeve, që ata i konsideronin “klasa të përmbysura”, apo i akuzonin si; “armiq të popullit”, kryesisht familje të pasura apo të shtresës së mesme, ish-funksionarë të Monarkisë së Zogut, që gjatë periudhës së pushtimit të vendit, kishin aderuar apo kishin mbështetur organizatën nacionaliste “Balli Kombëtar” e Legalitetin.
Po kjo “praktikë”, pra masa ndëshkuese e internim-dëbimeve, do të zhvillohej edhe ndaj qindra e qindra komunistëve, (nga ata më të thjeshtët e, deri tek ish-anëtarët e Byrosë Politike të Komitetit Qendror të PPSH-së), deputetë, ministra, ushtarakë e funksionarë të lartë etj., e familjeve të tyre, të cilët Enver Hoxha dhe regjimi komunist në fuqi, do t’i shpallte “tradhtar, revizionistë, armiqtë të popullit”, etj. Nga viti 1944, e deri në 1949-ën, vendimi për internim-dëbimet bëheshin nga “Komisioni i Dëbimeve dhe Konfiskimit të Pasurive”, që funksiononte pranë Ministrisë së Punëve të Brendshme, komision i cili në vitet në vijim, e ndryshoi disa herë emërtesën, deri sa në vitin 1954, kaloi në varësi të Kryeministrisë, duke u quajtur “Komisioni i Internim-Dëbimeve”, i cili funksionoi rregullisht deri në vitin 1990.
Që nga viti 1954 e, deri në 1974-ën, kryetar i atij komisioni ishte Beqir Balluku, anëtari i Byrosë Politike të Komitetit Qendror të PPSh-së, që mbante funksionin e ministrit të Mbrojtjes Popullore dhe njëkohësisht atë të zv. kryeministrit të qeverisë së kryesuar nga Mehmet Shehu, kurse zv. kryetar i komisionit, ishte ministri i Punëve të Brendshme, Kadri Hazbiu, ndërsa si anëtarë, Prokurori i Përgjithshëm Dhori Panariti, e kryetari i Gjykatës së Lartë, Aranit Çela. (Pas dënimit të Beqir Ballukut, në vitin 1974, funksionin e kryetarit të Internim-Dëbimeve, e mori zv. kryeministri Manush Myftiu, kurse pas dënimit të Kadri Hazbiut, funksionin e nënkryetarit e mori Hekuran Isai).
Ky komision, gjatë gjithë periudhës së ekzistencës e funksionimit të tij, dha me dhjetëra e qindra vendime, duke dëbuar e internuar me mijra persona, të cilët hiqeshin me dhunë nga vendet e tyre të banimit dhe detyroheshin të jetonin e banonin në fshatra dhe zona të thella të vendit, nga jugu në veri. Kryesisht fshatrat me vendet e kampet e internimit ishin caktuar nga qeveria në zonën e Myzeqesë së Lushnjes e Fierit, (Savër, Çermë, Bedat, Grabian, Gradisht, Plug, Gjazë, Zhamë, Sulzotaj, Kryekuq, Karavasta, Shtyllas etj.), pra në pjesën qendrore të vendit, me qëllim që ata të ishin sa më larg kufijve shtetëror, që të mos arratiseshin jashtë Shqipërisë. Po kështu, përveç masave me internime dhe dëbime, komisioni qeveritar, jepte vendime edhe për sekuestrimin e pasurisë së të gjithë personave që arratiseshin nga Shqipëria.
Në bazë të ligjit përkatës me të cilin funksiononte Komisioni i Internim-Dëbimeve, një person, apo një familje, fillimisht internohej për pesë vjet, por ato përsëriteshin, duke u shtyrë çdo pesë vjet, aq sa familje të tëra, kryesisht nga Veriu i Shqipërisë, si: Gjonmarkajt e Mirditës, Kalosht, Sina-jt, Alia-jt, Demat, Dinet, Menat e Ndretë e Dibrës, Bajraktari e Kolgjini të Kukësit, Kola-jt, Allamant e Sulkurtët e Matit, Merlikat, Kupët e Bami të Krujës, Mirakajt e Pukës, Radi dhe Gjekaj të Shkodrës, Pervizt e Kurbinit, Mulletët e Petrelat Tiranës, apo ato nga Jugu i vendit, si; Dostët e Gjirokastrës, Frashëri dhe Çela të Përmetit e Kolonjës, Staraveckat e Skraparit, etj., etj., të cilët qëndruan në vendet e internimit deri në vitin 1991, kur dhe u shemb regjim i komunist. Madje disa prej tyre, edhe shumë vite më pas, sepse nuk kishin se ku të shkonin, pasi nuk u kishte mbetur asnjë kthinë ku të fusnin kokën!
Lidhur me sa më sipër etj., Memorie.al. ka siguruar një dosje voluminoze nga Arkivi i Ministrisë së Punëve të Brendshme (që mban siglën sekret, por tashmë prej kohësh e de-klasifikuar), me vendimet e Komisionit të Internim-Dëbimeve, të cilat po i publikojmë të plota dhe me faksimilet përkatëse; ku janë emrat e personave dhe familjet që janë dëbuar e internuar, si dhe akuzat përkatëse për çdonjërin prej tyre.
VENDIMI NR. 7 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Grupi 2/A
Tiranë, më 1.3.1967
VENDIM Nr. 7
Komisioni i Internim-Dëbimeve, i mbledhur me datën 1.3.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Që Ded Gjon Markun, i datëlindjes 1938, lindur në katundin Orosh të Mirditës, internuar me vendim Nr. 12, datë 2.3.1962, në rrethin e Lushnjes, për rrezikshmëri shoqërore, të dëbojë për 5 vjet kohë, duke i ndaluar banimin dhe qarkullimin në këto rrethe; Shkodër, Tropojë, Kukës, Dibër, Lezhë, Krujë, Mirditë, Elbasan, Librazhd, Pogradec, Korçë, Ersekë, Përmet, Gjirokastër, Sarandë, Vlorë, Fier, Berat, Durrës dhe Tiranë.
Dëbimi i fillon më 2.3.1967 dhe i mbaron më 2 Mars 1972, për 5 vjet kohë.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 9 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Ekz. Nr. 1
Tiranë, më 25.III.1967
VENDIM Nr. 9
Komisioni i Internim-Dëbimeve, i mbledhur me datën 25.III.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Për qëndrim të keq politik dhe meqë paraqet rrezikshmëri shoqërore, të internoj në Roskovec të rrethit të Fierit, për 5 vjet kohë, Dhora Andrea Leka, i datëlindjes 1920, lindur në Korçë dhe banues në qytetin e Beratit, shtresë e mesme, me arsim të lartë, e dënuar njëherë për krime kundër shtetit.
Internimi i saj fillon me datë 25.III.1967 dhe i mbaron me datë 25.III.1972.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 11 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Ekz. Nr. 1
Tiranë, më 28.III.1967
VENDIM Nr. 11
Komisioni i Internim-Dëbimeve, i mbledhur me datën 28.III.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Të internoj për 5 vjet kohë në sektorin e Grabjanit të rrethit Lushnjë:
1. Ismail Dacin, i biri i Jonuzit dhe i Hazbijes, i datëlindjes 1930, lindur dhe banues në Zall-Kalis të rrethit Dibër, nëpunës, shtresë e mesme, i përjashtuar nga Partia, i martuar me fëmijë.
2. Hysen Daci, i biri i Jonuzit dhe i Hazbijes, i datëlindjes 1917, lindur dhe banues në Zall-Kalis të rrethit Dibër, shtresë e mesme, i përjashtuar nga Partia, i martuar me fëmijë.
Të përmendurit janë elementë me qëndrim të keq politik dhe me rrezikshmëri të theksuar shoqërore.
Në mënyrë të organizuar, kanë penguar krijimin e kooperativës bujqësore në katundin Zall-Kalis. Edhe mbas krijimit të kooperativës, kanë sabotuar në mënyrë sistematike daljen e fshatarëve në punë.
Internimi u fillon me datën 28.III.1967 dhe u mbaron me datën 28.III.1972.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 12 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Ekz. Nr. 1
Tiranë, më 3.IV.1967
VENDIM Nr. 12
Komisioni i Internim-Dëbimeve, i mbledhur me datën 3.IV.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Për qëndrim te keq politik, meqë paraqet rrezikshmëri të theksuar shoqërore, të internoj në Rreshen për 5 vjet kohë, Kaso Mehmet Karafilin, i datëlindjes 1911, lindur në Konispol, banues në Tiranë, ish-nëpunës, shtresë e mesme.
Internimi i fillon me datën 3.IV/1967 dhe i mbaron me datën 3.IV.1972.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 15 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Ekz. Nr. 1
Tiranë, më 19.IV.1967
VENDIM Nr. 15
Komisioni i Internim-Dëbimeve, i mbledhur me datën 19.IV.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Të internojë për 5 vjet kohë, në katundin Ishëm të rrethit Durrës:
1. Vangjel Jorgji Manushi, i datëlindjes 1894, lindur në Berat dhe banues në qytetin e Durrësit, shtresë e pasur, pa punë.
2. Jorgji Vangjel Manushi, i datëlindjes 1926, lindur dhe banues në qytetin e Durrësit, i biri, pa punë.
3. Sotiraq Vangjel Manushi, i datëlindjes 1930, lindur në Bari të Italisë dhe banues në Durrës, mekanik, i biri.
4. Haritini Sotir Manushi, e datëlindjes 1905, e shoqja, pa punë.
5. Amalia Tito Manushi, e datëlindjes 1945, lindur dhe banuese në Durrës, nusja e djalit, pa punë.
6. Violeta Tefik Manushi, e datëlindjes 1945, lindur dhe banuese në Durrës, e reja, pa punë.
Të përmendurit paraqesin rrezikshmëri shoqërore të theksuar. Banorët e Lagjes Nr. 3 në Durrës, kanë vendosur largimin e tyre nga qyteti i Durrësit.
Internimi i tyre fillon me datën 19.4.1967 dhe mbaron me datën 19.4.1972, për 5 vjet kohë.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 16 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Ekz. Nr. 1
Tiranë, më 19.IV.1967
VENDIM Nr. 16
Komisioni i Internim-Dëbimeve, i mbledhur me datën 19.IV.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Të internojë për 5 vjet kohë, në katundin Qatrom të rrethit Korçë:
1. Sheme Hasan Koçibelli, i datëlindjes 1937, lindur në katundin Qatrom të rrethit Korçë, me banim në qytetin e Tiranës, me origjinë fshatar i pasur, me arsim fillor, ish-nëpunës, i martuar, me tre fëmijë, pa parti.
2. Avni Hasan Koçibelli, i datëlindjes 1941, lindur në katundin Qatrom të rrethit Korçë, me banim në qytetin e Tiranës, fshatar i pasur, me arsim 7-vjeçar, me profesion mekanik.
3. Reko Hasan Koçibelli, e datëlindjes 1904, e ëma e Shemes.
4. Sulejman Hasan Koçibelli, i datëlinjes 1929, i vëllai i Shemes.
5. Qefser Riza Koçibelli, e datëlindjes 1927, bashkëshortja e Shemes.
Gjatë luftës, familjarisht kanë qenë të lidhur me Ballin, mbas çlirimit iu shtetëzuan tokat dhe u shpallën kulakë.
Në vitin 1947, janë shpërngulur familjarisht nga Korça dhe u stabilizuan në Tiranë.
Për qëndrim të keq politik dhe….janë pushuar disa herë nga puna dhe tani janë pa punë.
Nga ana e Komitetit Ekzekutiv të qytetit, u është bërë thirrje për të shkuar në vend-lindje, por ata kanë refuzuar. Është vërtetuar se Shemia dhe Avniu janë shprehur në mënyrë armiqësore duke thënë: “Nuk shkojmë në fshat që t’na urdhërojnë shërbëtorët tanë, jeta në kooperativë është e keqe, sikur të na vij rasti, do t’i vrisnim me thikë, që nga i madhi deri tek më i vogli”!
Ditët e fundit, Shemia ka shfaqur tendenca terrori, duke thënë se; “Do të vras fëmijët, por nuk e lë pa vrarë më parë ndonjërin prej këtyre”.
Internimi fillon me datën 19.4.1967 dhe i mbaron me 19.4.1972.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 17 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË TEPËR SEKRET
KOMISIONI I INTERNIM DËBIMEVE Ekz. Nr. 1
Tiranë, më 27.IV.1967
VENDIM Nr. 17
Komisioni i Internim-Dëbimeve, i mbledhur me datën 27.IV.1967, në mbështetje të dekretit të Presidiumit të Kuvendit Popullor, Nr. 1906, datë 2.8.1954, mbasi studioi materialet dhe propozimet e paraqitur nga Ministria e P. të Brendshme,
VENDOSI:
Të internojë për 5 vjet kohë, në katundin Pagri të rrethit Përmet:
1. Feta Sali Mala, i datë-lindjes 1910, lindur në katundin Pagri të rrethit Përmet, me banim në qytetin e Tiranës, shtresë e mesme, me arsim të mesëm, pa punë.
2. Qamile Refat Mala, e datë-lindjes 1919, e shoqja, pa punë.
3. Vullnet Feta Mala, i datë-lindjes 1939, me profesion n/punës, pa punë, i biri.
4. Petrit Feta Mala, i datë-lindjes 1941, me profesion mekanik, pa punë, i biri.
5. Violeta Feta Mala, e datë-lindjes 1949, pa punë, e bija.
6. Dylbere Feta Mala, e datë-lindjes 1942, pa punë, e bija.
7. Diana Osman Mala, e datë-lindjes 1947, pa punë, e reja.
Internimi u fillon me datën 27.4.1967 dhe u mbaron me datë 27.4.1972, për 5 vjet kohë.
ZV/KRYETARI I KOMISIONIT KRYETARI I KOMISIONIT
KADRI HAZBIU ………………..
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 18 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË Grupi II/B
KOMISIONI I INTERNIM DËBIMEVE Tiranë, më 3.1.1967
VENDIM Nr. 18
Komisioni i Internim-Dëbimeve, i mbledhur me datën 3.1.1967, në bazë të paragrafit II-të, të nenin 3, të dekretit të Presidiumit të Kuvendit Popullor, Nr. 1906, datë 2.8.1954,
VENDOSI:
Konfiskimin e pjesës së pasurisë, së personave të poshtëshënuar:
1. Petraq Koli Papadhami, lindur dhe banues në qytetin e Korçës.
2. Thanas Koli Papadhami, lindur dhe banues në qytetin e Korçës.
3. Pandi Vasil Sterjo, lindur dhe banues në qytetin e Korçës.
Të përmendurit, më datën 26.9.1966, kanë tradhtuar atdheun, duke u arratisur jashtë shtetit, në Greqi.
ZV/KRYETARI I KOMISIONIT KRYETARI I KOMISIONIT
KADRI HAZBIU BEQIR BALLUKU
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
VENDIMI NR. 19 I KOMISIONIT TË INTERNIM-DËBIMEVE
REPUBLIKA POPULLORE E SHQIPËRISË Grupi II/B
KOMISIONI I INTERNIM DËBIMEVE Tiranë, më 3.1.1967
VENDIM Nr. 19
Komisioni i Internim-Dëbimeve, i mbledhur me datën 3.1.1967, në bazë të paragrafit II-të, të nenin 3, të dekretit të Presidiumit të Kuvendit Popullor, Nr. 1906, datë 2.8.1954,
VENDOSI:
Konfiskimin e pasurisë, së Çel Zenel Selimaj, nga katundi Valbonë i rrethit të Tropojës, i cili më datën 9.9.1966, u arratis në Jugosllavi, me të gjithë pjesëtarët e familjes. Memorie.al
ZV/KRYETARI I KOMISIONIT KRYETARI I KOMISIONIT
KADRI HAZBIU BEQIR BALLUKU
ANËTARËT
PROKURORI I PËRGJITHSHËM KRYETARI GJYKATËS LARTË
LEFTER GOGA ARANIT ÇELA
Vijon numrin e ardhshëm
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
