Tritan Shehu
Memorie.al/ Sot Bota mbarë Kujton, për të mos harruar kurrë, për të mos u përsëritur ato tmerre, krime monstruoze, që ndodhën në gjysmën e parë të viteve 40-të, si pasojë e atij Holokausti mbi popullin hebre, por dhe më gjerë, mbi miliona e miliona njerëz të pafajshëm, njerëz që aspironin të jetonin e të kontribuonin pozitivisht me jetën e tyre.
Fatkeqësisht njerëzimi njohu dhe gjenocide të tjera shumë vite më vonë, edhe në Rajonin tonë, edhe mbi kombin tonë.
Ndodhën në Bosnje, Kosovë etj. krime e tentativa të tilla “pastrimi etnik”, por qe ndryshe nga pranimi e falja e kërkuar jo një herë nga Gjermania për çfarë ka ndodhur dikur; Serbia asnjëherë nuk ka bërë një gjest të tillë njerëzor e çlirues edhe për atë vetë.
Fatkeqësisht dhe këto ditë rrezikohet të përsëriten agresione, pushtime, të bazuara mbi “ushqimin” e urrejtjeve njerëzore nga ide dominimi.
Dhe kjo nuk është larg nesh, po ndodh në Europën Qendrore, por me pasoja e “valë goditëse” edhe mbi Rajonin tonë.
Prandaj sot ne duke kujtuar atë ku mund të çojë “marrëzia” njerëzore, humbja e demokracisë, indoktrinimi i verbër, duke u përkulur me dhimbje mbi ato miliona viktima të atij Holokausti, përmirësojë dhe të ardhmen tonë.
Ato mësime tragjike të historisë na tregojnë se duhet të jemi shumë më të vëmendshëm, analizues për çdo akt, veprim, projekt, ide, që mund të rrezikojë demokracinë tonë perëndimore, rrugën tonë drejt BE, si familja jonë e vetme e përbashkët për të bashkëjetuar në paqe dhe mirëkuptim.
Dhe këto ne duhet t’i themi me zë të lartë, fort për të larguar çdo dyshim të krijuar edhe nga gabimet tona strategjike në politikat integruese, të jashtme e rajonale.
Ripërsëritja e rikonfirmimi i tyre, edhe nëpërmejt dokumenteve zyrtare si Rezoluta Parlamentare, nuk është asnjë herë e gabuar a e tepërt, veçanërisht kjo për Rajonin tonë të trazuar, për momentet historike që kalon Europa.
P.S. Ne foto Czeslawa Kwoka, e vrarë në moshën 14 vjeç, si miliona të tjerë, në Auschwitz shkurt 1943, me një injeksion fenoli.
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
