Dashnor Kaloçi
Pjesa e tretë
Memorie.al publikon disa dokumenta të panjohura të nxjerra nga Arkivi i Ministrisë së Punëve të Jashtme në Tiranë, të cilat i përkasin vitit 1990, ku ndodhet një korrespodenca e ambasadës shqiptare në Romë, me Ministrinë e Punëve të Jashtme në Tiranë, ku ambasadori shqiptar, Dashnor Dervishi, informon ministrin Reiz Malile dhe eprorët e tjerë të tij në Tiranë, lidhur me letrën e dërguar pranë asaj përfaqësie diplomatike nga ana e Sekretarit të Shtetit të Vatikanit, Kryepeshkopit, Angelo Sordano, i cili shprehte dëshirën për të ardhur vetë në Shqipëri, me qëllim për të takuar ish – priftin katolik, Monsinjor Nikolla Troshanin, i cili pasi kishte kaluar vite të tëra në burgjet e regjimit komunist të Enver Hoxhës, në atë kohë punonte në bujqësi në fshatrat e rrethin të Lezhës. Korrespodenca e plotë në mes ambasadës shqiptare në Romë dhe titullarëve më të lartë të Ministrisë së Punëve të Jashtme në Tiranë, ku përveç interesimit të madh, të shfaqur nga Vatikani për ish – Peshkopin, Nikolla Troshani me të cilin ata kishin humbur çdo lidhje, që nga koha e burgosjes së tij dhe nuk dinin nëse ai jetonte ende, si dhe përgëzimet ndaj qeverisë shqiptare, për pritjen që i bëri Nënë Terezës, ambasadori Dervish i bën me dije eprorëve të tij, se dy profesorët e Teologjisë në Universitetin e Romës, Andrea Rikardo dhe Damako në Universitetin e Barit, i kishin thënë se: Vatikani po shfaqte interesim të madh, për zhvillimet në Shqipëri dhe veprimtarinë e saj në arenën ndërkombëtare, ku në mënyrë të veçantë Selia e Shenjtë, po shprehte interes për integrimin e Shqipërisë në KSBE dhe po ndërhynte pranë qeverive të Europës Perëndimore, që të mbështesë hyrjen e saj në KSBE, para se të mblidhej konferenca e Helsinkit, etj., e deri tek përpjekjet e ambasadorit shëtitës të Vatikanit në vendet e Europës Lindore, Kolosuono, i cili i kishte konfirmuar se Vatikani kishte përgatitur dyzet peshkopë shqiptarë nga Kosova, në shkollat e Romës dhe po bëhej gati të krijonte diogjenezën me qendër në Prishtinë, që do të varej direkt nga Roma.
Telegram i ambasadës shqiptare në Poloni, dërguar Ministrisë së Punëve të Jashtme në Tiranë, lidhur me pritjet e dhëna nga ambasada e Vatikanit në Varshavë
D E SH I F R I M
Nr. 23514 Nga: Varshava
Nr.640 Data 22.8.1990
MINISTRISË JASHTME
Për rreth 9 muaj që kur Dekan i trupit diplomatik është bërë përfaqësuesi i Vatikanit, nuk kam marrë pjesë në pritjet që bëri Vatikani, në sallën e tij për ambasadorët me rastin e largimit. Kjo ka rënë në sy të kolegëve, të cilëve u kam thënë se nuk kam ardhur me që…
(vijon)
D Ë SH I F R I M
Nr. 23515 Nga: Varshava
Nr. 641 Data: e dyta
….nuk kemi marrëdhënie diplomatike me Vatikanin. Ndonjë prej tyre më ka thënë se atje shkohet për t’u ndarë me kolegët që ke bashkëpunuar kaq vjet, e jo për Vatikanin. Me datën 30 dhe 31 gusht….
(vijon)
D Ë SH I F R I M
Nr. 23316 Nga: Varshava
Nr. 642 Data: mbaroi
….rastisi që do të përcillen ambasadorët e Bullgarisë, Greqisë, dhe Jugosllavisë, me të cilët kam pasur kontakte më tepër. Lutemi më udhëzoni si të veproj….
Vironi
Letra e zv/ministrit të Punëve të Jashtme, Sokrat Plaka, për ambasadën shqiptare në Poloni, lidhur me pritjet e dhëna nga ambasada e Vatikanit
SH I F R I M
Nr. 3111 Data: 28.8.1990
Adresa: Ambasadës (shokut Viron)
Varshavë
Koncepti: Tuajit 640
Në aktivitetet që organizohen nga përfaqësia e Vatikanit, me cilësinë e diplomatit për ceremoninë e largimit të titullarëve merrni pjesë.
Sokrati
Telegram i ambasadës shqiptare në Beograd, dërguar Ministrisë së Punëve të Jashtme në Tiranë, për pritjen që i’u bëri qeveria e Millosheviçit një delegacioni të përbërë nga përfaqësues disa religjioneve fetare, si dhe problemin e helmimit të nxënësve të Kosovës
D Ë SH I F R I M
Nr. 25062 Nga: Beogradi
Nr. 2518 Data: 10.9.1990
MINISTRISË SË JASHTME
Këto ditë këtu ishte për vizitë një delegacion me karakter fetar, i një organizate të tillë ndërkombëtare joqeveritare, i përbërë nga një rabin hebre, një prift katolik dhe një ortodoks. Këtë ma tha një diplomate me origjinë shqiptare…
(vijon)
D Ë SH I F R I M
Nr. 25063 Nga: Beogradi
Nr. 2519 Data: e dyta
…në ambasadën e Vatikanit i cili, ishte takuar me delegacionin. Për këtë delegacion kishte treguar një vëmendje të veçantë dhe Presidenti i Jugosllavisë, i cili jo vetëm që i priti por i vuri në dispozicion një helikopter që të shkonin në Prishtinë….
(vijon)
D Ë SH I F R I M
Nr. 25064 Nga: Beogradi
Nr. 2520 Data: e treta
Diplomati i Vatikanit, tha se gjithë këto përkujdesje të Millosheviçit, nuk mund të influencojnë dot në përshtypjet që krijon njeriu gjatë vizitës në Kosovë. Prifti arbëresh, ndjehej i qetë që delegacioni, kishte marrë kontakte me priftërinjtë….
(vijon)
D Ë SH I F R I M
Nr. 25065 Nga: Beogradi
Nr. 2521 Data: e katërta
….katolikë në Kosovë e sidomos me arqipeshkvin e Ferizajt, Lush Marku, i cili para disa kohësh, kishte qenë në një seminar në Romë dhe kishte folur në prani të Kryeministrit Andreoti, për gjendjen në Kosovë.
(vijon)
D Ë SH I F R I M
Nr. 25066 Nga: Beogradi
Nr. 2522 Data: e pesta
Sipas diplomatit të Vatikanit, kisha katolike e Kosovës, qëndron në pozita të forta kombëtare dhe do ta çojë deri në fund çështjen e barnave, që u morën në Ferizaj nga autoritetet serbe.
(vijon)
D Ë SH I F R I M
Nr. 25067 Nga: Beogradi
Nr. 2523 Data: e gjashta (mbaroi)
Aq absurd ishte ky veprim, thoshte bashkëbiseduesi, saqë po ajo propagandë që deri dje thoshte se nuk ka patur helmim në Kosovë, tani deklaron se ilaçet e gjetura në kishat katolike të Kosovës, kanë qenë shkaku i helmimit.
Kujtimi
Nr. 25068 Nga: Beogradi
Nr. 2524 Data: e shtata
Atëherë del pyetja, a ka pasur apo jo helmim? Arqipeshkvi i kishës katolike të Ferizajt që u ka dërguar një letër të gjithë udhëheqjeve federative, republikane, dhe krahinore, të vendit ngul këmbë dhe paraqet dokumentacionin e plotë të të gjitha dërgesave me…
(vijon)
D Ë SH I F R I M
Nr. 25069 Nga: Beogradi
Nr. 2525 Data: e teta
…ilaçe që janë bërë nga vende të ndryshme të botës, për të ndihmuar ata që nuk kanë para të blejnë ilaçe, ose për të gjetur ato lloj ilaçesh që mungojnë në tregun e vendit. Ai është gati gjithashtu të paraqesë edhe dokumentacionin…
D Ë SH I F R I M
Nr. 25070 Nga: Beogradi
Nr. 2526 Data: mbaroi
…të plotë të personave të cilëve u është dhënë ndihmë me barna dhe lloji i ilaçit që u është dhënë. Mbi këtë bazë ai do të kërkojë që të kthehen të gjitha ilaçet që i janë konfiskuar në mënyrë ilegale dhe mendimi është se do t’ia arrij këtij qëllimi…
Kujtimi
D Ë SH I F R I M
Nr. 30836 Nga: Beogradi
Nr. 3206 Data: 3.12.1990
MINISTRISË SË JASHTME
Në një pritje ambasadori i Vatikanit sugjeroi, që të më bënte një vizitë ku të njihja zhvillimet e brendshme në vendin tonë. Nuk caktova gjë me të por i thashë që do të kemi raste për të biseduar. Në rast se e ngre përsëri kërkesën, mendoj ta pranoj. Lutemi mendimin tuaj.
Kujtim
Telegram i ambasadorit shqiptar në Algjer, Dhimitër Lamani, dërguar Ministrisë së Punëve të Jashtme në Tiranë, për ftesën e bërë nga ambasada e Vatikanit
D Ë SH I F R I M
Nr. 36729 Nga: Algjeri
Nr. 449 Data: 3.10.1990.
MINISTRISË SË JASHTME
Ambasadori i Vatikanit, na ka ftuar në një reçension në rezidencën e tij dhe në një meshë, në kishën e këtushme, me rastin e përvjetorit të Papës Zhan Pol. Lutemi njoftoni.
Dhimitri
Telegram i zv / ministrit të Punëve të Jashtme, Sokrat Plaka, dërguar ambasadës shqiptare në Algjer, për ftesën e bëra nga ambasada e Vatikanit
SH I F R I M
Nr. 3638 Data: 5.10.1990
Adresa: Ambasadës Algjer (shokut Dhimitër)
Koncepti: Tuajit 449. Në aktivitetin që organizon ambasada e Vatikanit, mos shkoni dhe lëreni në heshtje.
Sokrati
Telegram i ambasadës shqiptarë në Athinë, dërguar Ministrisë së Punëve të Jashtme në Tiranë, për ftesën e bërë nga ambasada e Vatikanit
D Ë SH I F R I M
Nr. 29392 Nga: Athina
Nr. 1792 Data: 21.11.1990
MINISTRISË SË JASHTME
Nunci i Vatikanit, më fton për pritjen në festën kombëtare në 5 dhjetor. Ai, i paraqiti kredencialet para disa ditëve dhe më ka dërguar gjithashtu notën përkatëse. Lutemi mendimin tuaj për të marrë pjesë në pritje. /Memorie.al
Izedini
Copyright©“Memorie.al”
Të gjitha të drejtat e këtij materiali janë pronë ekskluzive dhe e patjetërsueshme e “Memorie.al”, sipas Ligjit Nr.35/2016 “Për të drejtat e autorit dhe të drejtat e tjera të lidhura me to”. Ndalohet kategorikisht kopjimi, publikimi, shpërndarja, tjetërsimi etj., pa autorizimin e “Memorie.al”, në të kundërt çdo shkelës do mbajë përgjegjësi sipas nenit 179 të Ligjit 35/2016
